Актывіст АГП: Пытанне пра фальсіфікацыі «выбараў» вывела Ярмошыну з раўнавагі
29- 1.12.2015, 11:03
- 17,975
У Астравецкім раёне асобныя грамадзяне працягваюць задаваць нязручныя пытанні кіраўніцы Цэнтрвыбаркама, а таксама звяртацца ў іншыя дзяржорганы.
Пра гэта актывіст Аб'яднанай грамадзянскай партыі Мікалай Уласевіч піша на сайце ucpb.org.
«Як ужо я паведамляў, на пытанне абнародаваць вынікі «выбараў» па кожным з 33 выбарчых участкаў раёна, Лідзія Ярмошына, нягледзячы на тое, што ВК прадугледжвае падрыхтоўку і правядзенне выбараў весці адкрыта і галосна, адказала адмовай, спаслаўшыся на недарэчнае у гэтым выпадку сцвярджэнне аб тым, што абвяшчэнне такога роду інфармацыі заканадаўства не прадугледжвае.
Добра, згодны, не прадугледжана. Але ж і не забаронена? А калі не забаронена, то павінен дзейнічаць вядомы прынцып грамадзянскага права, дазволена! І калі паказаную вышэй інфармацыю людзі просяць абвясціць, то чаму тады, паважаная Лідзія Міхайлаўна, не працуе арт. 13 ВК аб адкрытасці і галоснасці правядзення ў краіне «выбараў»?
Ці вось яшчэ адно пытанне, якое таксама засталося без адказу ў сутнасці і зададзенае Ярмошынай і адначасова Саўміну.
Абнародуйце дэталёвую справаздачу аб тым, колькі каштавала фальсіфікацыя праведзеных у Астравецкім раёне апошніх выбараў па кожнаму асобна ўзятаму выбарчым участку. Але як відаць з адказу, мяркуючы па тым, што ў ім Ярмошына заяўляе аб спыненні перапіскі з заяўнікамі, то і гэтае пытанне апынулася настолькі нязручным, што вывела яе проста з раўнавагі.
Вось і судзіце паважаныя грамадзяне і грамадзянкі Рэспублікі Беларусь, якая ў нас на самай справе празрыстасць выбарчага працэсу і ці можна давяраць яго вынікам?» - разважае актывіст.