Ад петыцыі да Марша студэнтаў: як развіваўся пратэст

Беларускія студэнты плануюць сабрацца на «Марш любові і салідарнасці» 2 снежня.

Акцыя пратэсту плануецца каля адміністрацыі БДУ а 11:50. Дадатковую інфармацыю арганізатары апублікуюць найбліжэйшым часам у «ВКонтакте».

Гэта першы ініцыяваны студэнтамі пратэст за апошні дзесятак гадоў. І калі спачатку студэнтаў не ладзілі платныя пераздачы, то ўжо цяпер яны выступаюць за права ўдзельнічаць у кіраванні ўніверсітэтам, паведамляе «Еўрарадыё».

Але што прывяло да такой актыўнасці, разбярэмся паслядоўна.

Другога лістапада адміністрацыя БДУ заяўляе пра намер ўвесці ва ўніверсітэце платныя пераздачы. Гэтая ВНУ была адной з апошніх, дзе грошы за пераздачы не бралі. Студэнты ў адказ пачынаюць збор подпісаў супраць такой пастановы.

Ужо 11 лістапада студэнты падаюць у рэктарат 2,5 тысячы подпісаў супраць увядзення аплаты за пераздачы. Яны падкрэсліваюць, што выступаюць за дыялог з адміністрацыяй. Прычым, такі дыялог мусіць быць у краіне, якая ўвайшла ў Балонскі працэс.

Больш радыкальная група студэнтаў прапануе звяртацца ў пракуратуру і суд, яны намагаюць на незаконнасці аплаты пераздач. У сацсетках адразу з'яўляецца некалькі груп, якія збіраюць усіх, хто выступае супраць новаўвядзення.

Ініцыятары руху ― студэнты 2-4 курсаў розных факультэтаў. Як удалося высветліць Еўрарадыё, большасць з іх мела адну ці ніводнай пераздачы за час вучобы.

Адміністрацыя БДУ ўсё ж уводзіць платныя пераздачы загадам рэктара 12 лістапада, на наступны дзень пасля падачы петыцыі студэнтамі. Апошнія дамагаюцца сустрэчы з адміністрацыяй, але яна не адбываецца. Паступова да незадаволеных далучаюцца студэнты БДПУ імя Максіма Танка ды іншых універсітэтаў.

І раптам 24 лістапада ў сваёй групе ў сацсетках студэнты заяўляюць аб правядзенні маршу. Мяняюцца і патрабаванні. Платныя пераздачы адыходзяць на другі план. Цяпер студэнты хочуць: паўнавартаснага ўключэння ў кіраванне ўніверсітэтам адміністрацыі, студэнтаў і выкладчыкаў. А таксама рэальнага самакіравання і рэформы вышэйшай адукацыі.

На наступны дзень рэктар БДУ Сяргей Абламейка выступае з заявай наконт платных пераздач. Ён называе гэты крок «клопатам пра якасць адукацыі».

«Уважаем непрымальнымі спробы ўцягнуць студэнтаў нашага ўніверсітэта і іншых універсітэтаў краіны ў дэструктыўныя працэсы, закліканыя раскалоць акадэмічную супольнасць, скампраметаваць сістэму вышэйшай адукацыі краіны», ― адзначае рэктар у сваёй заяве.

Паралельна актывізуюцца афіцыйныя студэнцкія арганізацыі і заяўляюць аб акцыі «Я частка БДУ». Менавіта такую аватарку трэба паставіць тым, хто падтрымлівае дзеянні адміністрацыі.

Таксама становіцца вядома ці то пра канцэрт, ці то пра мітынг, які пройдзе ў той жа дзень, што і Марш студэнтаў.

І ўжо 30 лістапада БДУ абвяшчае кошты. Пераздаць іспыт ― 47 тысяч у звычайнага выкладчыка, 50 тысяч у дацэнта, 53 тысячы ў прафесара. Залікі будуць каштаваць ад 33 да 37 тысяч. Гэта амаль удвая даражэй, чым ва Універсітэце інфарматыкі і радыёэлектронікі.