Мэркель і Аланд: Парушальніка Менскіх пагадненняў чакаюць новыя санкцыі
43- 20.02.2015, 17:47
- 45,086
Санкцыі супраць РФ могуць быць пашыраныя.
Пра гэта заявіў прэзідэнт Францыі Франсуа Аланд падчас сумеснай прэс-канферэнцыі з канцлеркай Нямеччыны Ангелай Мэркель, паведамляе "Украінская праўда" са спасылкай на Les Echos.
"У дачыненні да ўсякай краіны, якая не будзе прытрымлівацца менскіх дамоўленасцей аб Украіне, будуць ужытыя санкцыі", - адзначыў ён.
Са слоў Аланда, гаворка ідзе перш за ўсё пра "спыненне агню, якое было неаднаразова парушанае, і якое цяпер павінна быць цалкам захаванае, вывад цяжкіх узбраенняў і вызваленне зняволеных".
"Мы будзем працягваць працаваць над эфектыўнасцю менскіх дамоўленасцей", - сказаў ён.
Канцлерка Нямеччыны Ангела Мэркель таксама заявіла, што не выключае магчымасці разгляду новых санкцыяў у дачыненні да Расеі. Яна ўдакладніла, што новыя санкцыі супраць Расеі не з'яўляюцца мэтай. Гэта толькі магчымасць у выпадку парушэння менскіх пагадненняў, піша Gazeta.ru.
Канцлерка таксама дадала, што Еўрапейскі звяз "можа падняць пытанне пра санкцыі" ў выпадку неабходнасці.
"Мы яшчэ больш перакананыя ў тым, што менскія пагадненні павінны ўвасабляцца", - адзначылі абодва лідары.
16 лютага Еўразвяз пашырыў санкцыі ў дачыненні да Расеі ў сувязі з сітуацыяй ва Украіне. Пад санкцыі трапілі 19 фізічных і 9 юрыдычных асоб.
Фота: Reuters