Чаму чыноўнікі баяцца слова «дэвальвацыя»?
16- 26.02.2015, 14:10
- 38,931
Чыноўнікі замяняюць слова «дэвальвацыя» і «крызіс» іншымі словамі. Гэтыя словы пад забаронай?
Учора на прэзэнтацыі новай праграмы ў "парламэнце" сабраліся ўсе члены ўрада.
- Вы задаволеныя праграмай? - удакладніла «Комсомольская правда в Беларуси» ў першага віцэ-прэм'ера Васіля Мацюшэўскага, які адказвае ва ўрадзе за эканоміку.
- Задаволеныя мы будзем тады, калі мы яе зрэалізуем. Цяпер мы задаволены той работай, якая зробленая. Работа была вельмі няпростая, са зразумелых прычын.
- Прэм'ер сказаў, што рубель адчувае сябе ўпэўнена з курсам 15 тысяч за даляр. Вы таксама гэтак мяркуеце?
- З тымі ўнутранымі і вонкавымі варункамі - так. Вы ж бачыце, абсалютна узважаны цяпер стан.
- У праграме ўрада прапісаныя гіпатэчныя крэдыты на жыллё. Як яны могуць з'явіцца пры такіх стаўках, якія сёння існуюць у беларускіх банках?
- Вы, напэўна, памятаеце, пра што казаў Нацыянальны банк: мы пераходзім фактычна да таргетавання інфляцыі (да захадаў, якія дапамагаюць кантраляваць кошты). Спачатку зніжаем інфляцыю, наступны крок - зніжаем узровень ставак у эканоміцы. А далей гэта даступнасць крэдытаў, у тым ліку і гіпатэчных.
- Чамусьці ў нашым ўрадзе не прамаўляюць слова «дэвальвацыя» ды «крызіс» і замяняюць іх іншымі словамі. Гэтыя словы забароненыя?
- Я не ведаю, чаму нехта нешта вымаўляе. Я не бачыў ніводнага нарматыўнага акту, які б забараняў слова «дэвальвацыя».
Нагадаем, з 20 снежня 2014 года Нацбанк увёў 30-адсоткавы збор пры куплі гатовай валюты. Ён павінен быў дзейнічаць да 1 лютага, але быў ануляваны з 8 студзеня. Пры гэтым пасля 20 снежня курс беларускага рубля на біржы пачаў слабець. На сёння нацыянальная валюта патаннела да даляра на 40%.