Рабаванне банка ў Мазырскім раёне: злачынца скраў Br80 мільёнаў
28- 4.02.2015, 11:07
- 22,150
У Мазырскім раёне абрабавалі банк, распачатая крымінальная справа.
Пра гэта паведамілі агенцтву «Інтэрфакс-Захад» ва ўпраўленні Следчага камітэта Гомельскай вобласці.
«Падчас правядзення першапачатковых следчых дзеянняў устаноўлена, што 3 лютага а 19.40 у аддзяленні філіяла банка неапазнаны мужчына, пагражаючы нажом аператару-касіру, завалодаў ключамі ад сейфа і выкраў блізу Br80 млн» - праінфармавалі ў УСК.
Паводле звестак следчых, выкрадзеныя грошы мужчына паклаў у палімерны пакет, забраў мабільны тэлефон пацярпелай, замкнуў яе ў памяшканні банка і схаваўся.
На месцы здарэння цягам вечара і ночы працавала следча-аператыўная група, супрацоўнікі следчага ўпраўлення УСК Гомельскай вобласці, эксперты-крыміналісты міжраённага аддзела УДКСЭ Гомельскай вобласці. Каардынацыю работы вёў намеснік начальніка УСК Гомельскай вобласці.
Супрацоўнікамі міліцыі праводзяцца аператыўна-вышуковыя мерапрыемствы, накіраваныя на высвятленне асобы, якая ўчынiла злачынства.
Мазырскім РАСК распачатая крымінальная справа паводле прыкметаў злачынства, прадугледжанага часткай 2 артыкула 207 (разбой, учынены з мэтай завалодвання маёмасцю ў значнай суме) КК Рэспублікі Беларусь.