«Заходнебеларускую Атлантыду» прэзентавалі ў Варшаве
- 4.02.2015, 16:06
- 6,205
Кандыдат гістарычных навук Ігар Мельнікаў прэзентаваў чытачам сваю новую кнігу пра міжваенны перыяд у Заходняй Беларусі.
Прэзентацыя прайшла ў Беларускім доме ў Варшаве.
Галоўныя героі на старонках «заходнебеларускай Атлантыды» - звычайныя жыхары, вайскоўцы, рабочыя, эмігранты, кантрабандысты, людзі, якія займаліся крыміналам і прастытуцыяй, паведамляе «Радыё Рацыя».
Акрамя таго, у кнізе можна знайсці звесткі аб вераснёўскай кампаніі 1939 года.
«Паказваць гісторыю Беларусі толькі праз КПЗБ - няправільна. Несавецкая гісторыя не перастае быць беларускай гісторыяй, - мяркуе аўтар. - Сапраўды, мы былі падзеленыя на «заходнікаў» і «ўсходнікаў». І гэты падзел сярод старых людзей сапраўды існуе. Але разам з тым ёсць і ментальны падзел - на «савецкіх» і «несавецкіх». Моладзь ужо менш да гэтага здатная, але «рыжская мяжа» - гэта вельмі цікавы гістарычны аб'ект, ад якога не варта было б адмаўляцца. Варта было б туды прывозіць і беларусаў, і замежнікаў, каб паказаць тую няпростую гісторыю».
Фота: «Радыё Рацыя»