Падатак на запазычанасці: каму і як яго трэба плаціць

Змены ў Падатковы кодэкс, якія пачалі дзейнічаць з 1 студзеня 2015 года, закранулі і тых грамадзян, якія пазычалі грошы на нейкія пакупкі.

Карыстальнікі ў інтэрнэце тут жа пачалі казаць, што цяпер плаціць падатак трэба будзе нават калі пазычыў у суседа «да заробку». Tut.by на прыкладзе сітуацый з жыцця разбіраўся, каго закране навіна і з якіх менавіта запазычанасцяў трэба будзе плаціць падатак.

1. Вы запазычылі ў калегі, суседа ці сябра нейкую суму «да заробка»

Як тлумачаць у Міністэрстве падаткаў і збораў, гаворка не ідзе пра тое, што ўсе такія грамадзяне павінны тут жа ісці ў падатковую.

- Новаўвядзенне тычыцца тых грамадзян, якія на патрабаванне падатковых органаў павінны падаць дэкларацыю аб даходах і маёмасці, - тлумачыць начальнік галоўнага ўпраўлення падаткаабкладання фізічных асоб Міністэрства падаткаў і збораў Міхаіл Расолька. - Напрыклад, грамадзянін рабіў дарагія пакупкі (нерухомасць, аўтамабіль і гэтак далей), але пры гэтым атрымліваў невялікі заробак або зусім не меў прыбытку. Калі ў дэкларацыі аб даходах і маёмасці ён пакажа, што рабіў гэтыя пакупкі за кошт пазыкаў у іншай фізічнай асобы, то з гэтай сумы яму трэба будзе заплаціць падаходны падатак.

Такі ж прынцып будзе дзейнічаць, калі фізічная асоба, якая пазычыла грошы, з'яўляецца грамадзянінам іншай дзяржавы.

2. Вы запазычылі ў бацькоў (іншых блізкіх сваякоў) на пакупкі

Калі грамадзянін пакажа ў дэкларацыі аб даходах і маёмасці, што грошы на пакупкі яму пазычылі блізкія сваякі, то плаціць падатак не трэба. Прычым незалежна ад сумы запазычанасці.

3. Грошы на пакупкі вам пазычыла замежная арганізацыя (напрыклад, банк)

У гэтым выпадку будзе дзейнічаць прынцып, як і ў першай сітуацыі: з сумы запазычанасці трэба будзе заплаціць падаходны падатак.

4. Грошы вы пазычылі ў беларускім банку і, напрыклад, купілі машыну ці кватэру ў крэдыт

- Калі грамадзянін пацвердзіць, што свае выдаткі ён ажыццяўляў за кошт крэдыту, аформленага ў беларускім банку, то плаціць падатак з такіх запазычанасцей не трэба, - запэўніў Міхаіл Расолька.

5. Вы пазычылі грошы ў знаёмых, а праз паўгода вярнулі запазычанасць

Калі на дату падання дэкларацыі аб даходах і маёмасці з абавязкамі вы ўжо разлічыліся, то плаціць падатак не трэба. Калі ж запазычанасць яшчэ ёсць, то падатак выплаціць прыйдзецца, але ў будучыні гэтыя грошы вам могуць вярнуць.

- Падатковым кодэксам прадугледжана, што пры поўным пагашэнні (вяртанні) запазычанасці, крэдытаў выплачаны падаходны падатак падлягае вяртанню, - растлумачылі ў Міністэрстве падаткаў і збораў.

Адзіным выключэннем будзе сітуацыя, калі запазычанасць вы вярнулі за кошт новай пазыкі: напрыклад, пазычылі грошы ў суседа, каб аддаць запазычанасць калегу з працы.

Фота: bymedia.net