У Беларусі з'явіўся падатак на пазыкі

Плаціць падатак цяпер трэба і з грошай, якія ўзятыя ў пазыку ў суседа.

Плаціць падаходны падатак з 1 студзеня трэба не толькі з заробку, але і з грошай, якія ўзятыя ў пазыку. Напрыклад, у суседа або замежнага сябра, піша «Вячэрні Гродна».

Новаўвядзенне закране ў першую чаргу людзей, якія пры запаўненні дэкларацыі аб даходах і маёмасці растлумачаць, што кватэру ці аўтамабіль купілі за ўзятыя ў пазыку грошы. Пры гэтым пазыковая распіска можа быць аформленая хоць пяць гадоў таму.

Да такіх жа крэдытаў і пазыкаў належаць даходы ад замежных арганізацый і прадпрымальнікаў. Як паведамілі ў ІМПЗ па Гарадзенскай вобласці, выключэннем можа быць сітуацыя, калі ў крэдыт даў блізкі сваяк, сваяк, апякун, папячыцель і падапечны. Дарэчы, пасля вяртання пазыкі падатак можна вярнуць. Для гэтага трэба напісаць заяву і прынесці падатковаму інспектару дакумент, які пацвердзіць вяртанне пазыкі. Новая дамова пазыкі для вяртання існага крэдыту за такі дакумент не ўважаецца.

Газеты дакажуць, што праца была

З 1 студзеня падаткавікі не будуць даказваць, працаваў прадпрымальнік або адпачываў, каб прыцягнуць яго да выплаты падаткаў. Зрабіць гэта дапамогуць аб'явы ў газеце.

З гэтага года ў Падатковым кодэксе з'явілася паняцце «правядзенне дзейнасці плацельшчыка». Да прыкладу, калі прадпрымальнік апублікаваў аб'яву ў газеце і інтэрнэце аб аказанні паслуг або прыняў заказ, то мяркуецца, што ў гэтым месяцы ён працаваў і абавязаны заплаціць адзіны падатак.

Адзіны падатак вырас да 20 адсоткаў

Стаўкі адзінага падатку для ІП у Гарадзенскай вобласці выраслі ў сярэднім на 15-20 працэнтаў. Такую пастанову прыняў абласны «савет дэпутатаў» 20 студзеня. Як паведамілі ў ІМПЗ Гарадзенскай вобласці, дададзеныя або адкарэктаваныя некаторыя віды дзейнасці, а таксама ўсталяваныя новыя памеры ставак адзінага падатку. Напрыклад, гарадзенцы, якія гандлююць прадуктамі і вопраткай на рынках, будуць плаціць адпаведна 730 і 700 тысяч замест 600 тысяч рублёў у месяц.

Пакуль яшчэ выкарыстоўваюцца былыя стаўкі. Новыя будуць дзейнічаць з моманту афіцыйнага апублікавання пастановы аблсавету на Нацыянальным прававым інтэрнэт-партале.

Сочаць за валютай

Падатковая інспекцыя цяпер ведае пра тое, колькі валюты купляе кожны беларус. З 1 студзеня скасаваная банкаўская таямніца, і гэтая інфармацыя трапляе ў падатковыя базы звестак.