Штрафы за праезд без квітка вырастуць

Міністэрства транспарту ініцыюе павелічэнне памеру штрафаў за безбілетны праезд пасажыраў у грамадскім транспарце.

Як паведамілі БелаПАН у Мінтрансе, у гэтым годзе плануецца падрыхтаваць нарматыўныя акты ў частцы павелічэння памеру штрафаў за безбілетны праезд пасажыраў і ўзмацнення адміністрацыйнай адказнасці за правапарушэнні ў сферы пасажырскіх аўтаперавозак. Плануецца пашырэнне паўнамоцтваў Транспартнай інспекцыі на права складання і разгляду спраў аб адміністрацыйных правапарушэннях у гэтай сферы.

Як мяркуюць у Мінтрансе, у 2014 годзе не быў знойдзены аптымальны механізм для падвышэння акупнасці сацыяльна значных перавозак пасажыраў гарадскім і прыгарадным транспартам, які па-ранейшаму стратны (рэнтабельнасць перавозкі аўтобусамі - мінус 2,1%, тралейбусамі - мінус 17,6%, трамваямі - мінус 13,2%).

Пры гэтым, паводле звестак міністэрства, у мінулым годзе тарыфы на перавозку пасажыраў гарадскім транспартам узраслі ў паўтара разы ў Менску і на 30% - у абласцях, аўтобусамі на прыгарадных маршрутах - на 18%, што дазволіла трохі знізіць некампенсаваную частку выдаткаў. Аднак падвышэнне адстае ад распрацаванай Мінэканомікі дарожнай карты паэтапнай змены тарыфаў на паслугі ў перавозцы пасажыраў (у Менску - на 66,7%, у абласцях - на 55,5%).

Яшчэ больш істотнае адставанне ў перавозках пасажыраў чыгуначным транспартам у міжрэгіянальным, рэгіянальным і гарадскім паведамленні.

У транспартным ведамстве адзначаюць, што да гэтага часу не выпрацаваны механізм частковай кампенсацыі страт сацыяльна значных чыгуначных перавозак за кошт бюджэтных крыніц, што стрымлівае далейшае развіццё пасажырскіх перавозак і не фармуе ўмоў для павышэння іх эфектыўнасці.

Пры гэтым Мінтранс неаднаразова падаваў прапановы аб унясенні дапаўненняў у Бюджэтны кодэкс у частцы замацавання магчымасці і механізму фінансавання расходаў пры правядзенні чыгуначных пасажырскіх перавозак ва ўнутрырэспубліканскіх стасунках за кошт рэспубліканскага бюджэту, аднак Міністэрствам фінансаў яны падтрыманыя не былі.

Фота: bymedia.net