Грузаперавознік: На сістэме BelToll нагрэлі рукі нядобрасумленныя людзі

Грузаперавознікі спрабуюць дамовіцца з чыноўнікамі з нагоды амністыі штрафаў, выпісаных сістэмай BelToll.

Нягледзячы на тое, што за дзень да запланаванай на 4 лютага акцыі пратэсту быў затрыманы і асуджаны яе ініцыятар Сяргей Штода, сёння на прыём у Савет міністраў пайшоў ягоны калега Алег Новікаў. Прадпрымальнікі ўважаюць велізарныя спагнанні за незаслужаныя - паводле вынікаў «эксперыменту» некалькім тысячам грузаперавознікаў прыйшлі рахункі на сумы да 100 тысяч еўра, паведамляе «Радыё Свабода».

Перад аўдыенцыяй у чыноўнікаў Алег Новікаў назваў асноўныя прэтэнзіі да профільных ведамстваў, адказных за эксплуатацыю платных дарог.

«Нас ужо накармілі абяцаннямі: маўляў, падрыхтуйце тлумачэнні, адпраўце туды, будзем разбірацца, - распавядае ён. - Ну, былі падобныя на нас з Сяргеем, паслухалі гэтыя размовы. Ды яны і не адмаўляюць, што не дапамаглі нам з усім гэтым разабрацца, і, прынамсі, давалі зразумець, што гатовыя хоць бы часткова загладзіць сваю віну. Таму што пад гэтую шуміху, як ні круці, адназначна былі і нядобрасумленныя людзі. Але калі ўжо шукаць тых, хто паспеў нажыцца, то гэта тычыцца толькі пэўнай катэгорыі, а не ўсіх агулам.

Напрыклад, самыя вялікія праблемы былі, калі велікагрузам даюць бартавую прыладу на папаўненне сродкаў, і з невядомых прычын збіваецца колькасць восяў. Адпаведна, ідзе іншая аплата: скажам, у мяне пяць восяў, а бярэцца за дзве, то бок сума ў 4-5 разоў меншая. А потым - санкцыі. Уявіце: сядзіць кіроўца, ён жа не мае вышэйшай адукацыі. І нават калі мае, ён учора гэты апарат упершыню ў вочы ўбачыў. Ну, пікае ён два разы, і хай сабе. А колькі там восяў - хто яго ведае. Аддаў прыбор дзяўчынцы-аператару, якая так жа без паняцця, што там да чаго. Першы час яны наогул нічога параіць не маглі, адказвалі поўную лухту. Вось і ўсё. А ў людзей у выніку сабраліся такія штрафы.

Характэрна, што мы плацілі. У нас балансаў па месяцы адмоўных няма. Разумееце, я наездзіў, дапусцім, за месяц на мільён - у мяне, адпаведна, і плацяжоў на мільён. А вось і не, бо яны лічаць за кожны асобны узяты момант часу. У цябе павінна быць на рахунку мінімум 25 еўра. Хто так вызначыў? На самай справе ёсць такі маленькі пункцік: аператар мае права размяшчаць свабодныя грашовыя сродкі на дэпазітным, а ўсе прыбыткі - уласнасць Рэспублікі Беларусь. Гэта значыць, вы, хлопцы, скідвайце грошы, а мы іх падзелім. Памятаеце, былі рэляцыі, што 200 тысяч перавознікаў зарэгістраваныя ў сістэме BelToll. Такім чынам памнажайце спакойна гэтую лічбу на 25 еўра, колькі выходзіць? 5 мільёнаў еўра крэдыту! Ідзіце вазьміце крэдыт на 5 мільёнаў еўра. Вось і адказ. Яны «разумныя», а мы павінны за гэта плаціць. Прыкладна такі расклад..»

Нагадаем, у 2013 годзе ў Беларусі была ўведзеная сістэма платных дарог. Яшчэ на этапе рэалізацыі праекта Міністэрства транспарту прапанавала аўстрыйскаму інвестару пачаць паралельна выкарыстоўваць сістэму ў тэставым рэжыме. Перавознікаў абавязалі ўсталяваць бартавыя прыборы, не паклапаціўшыся, каб навучыць кіроўцаў імі карыстацца, арганізаваць пункты папаўнення рахункаў і г.д. У выніку тысячы машын выходзілі на маршруты, а гаспадары не падазравалі, што нешта парушаюць. Пачаўшы атрымліваць штрафы, перавознікі прапанавалі профільным ведамствам амніставаць спагнанні мінімум за тэставы перыяд. Але ніякай зацікаўленасці з боку чыноўнікаў не было.