Забойства Нямцова: затрыманыя адмаўляюць віну і паведамляюць пра катаванні

Заур Дадаеў заявіў праваабаронцам, што не прызнае сябе вінаватым.

На ягоным целе выяўленыя сляды збіцця, паведамляе BBC.

Сябры Грамадскай назіральнай камісіі (ГНК) змаглі пагутарыць у СІЗА «Лефортово» з арыштаванымі паводле справы аб забойстве Барыса Нямцова. Раней прадстаўнікі следства заяўлялі, што Заур Дадаеў ужо прызнаўся ва ўчыненні злачынства, аднак праваабаронцам ён паведаміў, што ён не забіваў апазіцыянера.

Таксама высветлілася, што Дадаеў быў у шэрагах батальёна «Поўнач» аж да 28 лютага.

Акрамя таго, у аўторак з'явіліся звесткі, што кілеры, магчыма, высочвалі Нямцова яшчэ з восені мінулага года.

«Ты забіў Нямцова?»

Са слоў Дадаева, яго вымусілі даць паказанні з прызнаннем віны ў абмен на вызваленне яго таварыша Руслана Юсупава. «Я думаў, у Маскву прывязуць, і я тут скажу на судзе ўсю праўду. Што я не вінаваты. Але суддзя нават слова мне не даў», - цытуе падазраванага газета «Московский комсомолец».

Заур Дадаеў таксама паскардзіўся сябрам ГНК на жорсткае абыходжанне і паказаў на целе сляды ад кайданоў на нагах і руках. «Увесь час крычалі: «Ты забіў Нямцова?». Я адказваў, што не», - распавядае Дадаеў падрабязнасці свайго затрымання.

Праваабаронцы накіравалі заяву дырэктару ФСВП, на чале Следчага камітэта і генпракурора Расеі з патрабаваннем правесці ў СІЗА дбайную праверку. Яны таксама папрасілі арганізаваць медыцынскі агляд і судовую медыцынскую экспертызу, а таксама забяспечыць асабістую недатыкальнасць і бяспеку Губашовых і Дадаева.

«Пасля размовы з імі [абвінавачанымі] і візуальнага агляду сябрамі ГНК устаноўленыя множныя сінякі і гематомы. Так, сябры ГНК візуальна ўстанавілі множныя ўдары і гематомы на руках і нагах Губашовых і Дадаева, на нагах Заўра Дадаева таксама былі зафіксаваныя гематомы і сляды ад кайданоў і на руках, і на нагах», - гаворыцца ў дакуменце.

З герояў у злачынцы

У выніку візіту ў СІЗА «Лефортово» сябраў ГНК высветліліся і іншыя разыходжанні паміж заявамі следства і словамі самога Дадаева.

Дадаеў займаў пасаду намесніка камандзіра спецыяльнага батальёна ўнутраных войскаў «Поўнач» і сцвярджае, што звольніўся з органаў толькі 28 лютага, гэта значыць на наступны дзень пасля забойства Барыса Нямцова. «28 лютага выйшаў загад аб маім звальненні, і за тыдзень я з героя ператварыўся ў небяспечнага злачынцу», - сказаў Дадаеў сябрам Грамадскай назіральнай камісіі, які наведаў яго ў СІЗА.

Гэтую інфармацыю пацвердзілі і ў камандаванні Унутраных войскаў Расеі. «Яго рапарт быў задаволены. З 27 студзеня ён знаходзіўся ў адпачынку за 2015, цягам 30 дзён - да 28 лютага. Па прыбыццю з адпачынку ён быў звольнены устаноўленым парадкам і выключаны са спісу вайсковай часткі», - сказаў тэлеканалу «Россия» першы намеснік кіраўніка войскамі Паўночна-Каўказскага рэгіянальнага камандавання ўнутраных войскаў Ігар Грудноў.

Пасля арышту Дадаева было абвешчана, што ён адмовіўся ад паслуг свайго адваката на карысць дзяржаўнага абаронцы. Аднак, праваабаронца, які наведаў Дадаева, заявіў, што нічога пра гэта не ведае і што яму патрэбны адвакат.

Не было іншых заказчыкаў?

Разам з Дадаевым арыштаваныя яшчэ чатыры чалавекі і яшчэ адзін падазраваны быў забіты ў Грозным пры спробе затрымання. Заур Дадаеў мяркуе, што калі б ён не даў прызнальныя паказанні ў момант затрымання, яго маглі б таксама забіць на месцы.

Барыс Нямцоў быў застрэлены ў цэнтры Масквы ў ноч на 28 лютага.

У аўторак інфармацыйнае агенцтва «Росбалт» распаўсюдзіла заяву неназванага прадстаўніка следства, згодна з якой заказчыка забойства Нямцова наогул не было.

«Вывучаючы довады, якія цяпер маюцца ў справе, паказанні сведак і асноўнага абвінавачанага, можна зрабіць адназначную выснову: забойства Нямцова з'яўлялася асабістай ініцыятывай Дадаева і Шаванова. У іх не было ніякіх іншых заказчыкаў», - цытуе «Росбалт» ананімную крыніцу.

Следству атрымалася высвятліць, што падазраваныя нібыта вялі сачэнне за Нямцовым яшчэ з восені мінулага года. Калі гэта так, то гэта наносіць сур'ёзны ўдар па версіі аб тым, што палітыку помсцілі за яго словы пра ісламістаў і Charlie Hebdo, так як напад на французскі часопіс адбылося сёлета ў студзені.