Кабякоў: Беларусь гатовая да шырокамаштабнага ўзаемадзеяння з КНДР

Прэм'ер-міністр Беларусі 11 сакавіка сустрэўся з міністрам замежных спраў КНДР Лі Су Ёнам.

Падчас сустрэчы Андрэй Кабякоў адзначыў, што Беларусь зацікаўленая ў выбудоўванні канструктыўных стасункаў з усімі партнёрамі. Традыцыйна адным з прыярытэтаў з'яўляецца развіццё ўзаемавыгаднага гандлёва-эканамічнага супрацоўніцтва, піша БелаПАН.

«Упэўнены, што ў гэтай сферы беларуска-карэйскія ўзаемастасункі валодаюць вялікім незадзейнічаным патэнцыялам», - сказаў прэм'ер. Ён дадаў, што Беларусь гатова да шырокамаштабнага ўзаемадзеяння з Карэйскай Народна-Дэмакратычнай Рэспублікай.

«Наколькі мне вядома, вы пазначылі наступныя прыярытэтныя напрамкі супрацоўніцтва: пастаўкі ў КНДР сельскагаспадарчай і аўтамабільнай тэхнікі і арганізацыя зборачных вытворчасцей гэтай тэхнікі, пастаўкі прадукцыі лёгкай прамысловасці, актывізацыя работы міжурадавай камісіі, супрацоўніцтва ў галіне сельскай гаспадаркі», - сказаў кіраўнік урада.

Міністэрства замежных спраў Беларусі, з ягоных слоў, скаардынуе працу для прапрацоўкі названых праектаў.

У прыватнасці, падчас цяперашняга візіту прадстаўнікі КНДР ужо наведалі шэраг прамысловых прадпрыемстваў Беларусі, дзе змаглі асабіста ацаніць іх патэнцыял. Кабякоў выказаў надзею на тое, што сустрэчы з кіраўніцтвам гэтых прадпрыемстваў прайшлі ў канструктыўным ключы і надалі пэўны імпульс развіццю беларуска-карэйскага ўзаемадзеяння.

Прэм'ер-міністр адзначыў, што карэйскаму боку ў сувязі з гэтым неабходна вызначыць канкрэтных партнёраў, гатовых да пастаяннага ўзаемадзеяння з беларускімі прадпрыемствамі.

«Што тычыцца аднаўлення работы міжурадавай камісіі, то мы абновім склад беларускай часткі і са свайго боку сфармуем прапановы ў магчымых напрамках супрацоўніцтва», - сказаў Андрэй Кабякоў. Ён падкрэсліў, што беларускі бок зацікаўлены ў эфектыўнай і ўзаемавыгаднай працы гэтай структуры.