Загінулы падазраваны ў забойстве Нямцова апазнаны

Падазраванага ў датычнасці да забойства Барыса Нямцова мужчыну, які падарваў сябе гранатай у Грозным, апазналі.

Паводле звестак РБК, якое спасылаецца на крыніцу, блізкую да МУС Чачні, а таксама на суразмоўцу ў Радзе бяспекі Інгушэціі, гэта жыхар чачэнскай сталіцы Бэслан Шаванаў.

У спісах адшукваных за якія-небудзь злачынствы ён раней не значыўся. Арыентацыя на яго прыйшла з Масквы. Афіцыйнага пацверджання таго, што загінулы быў фігурантам крымінальнай справы аб забойстве Нямцова, пакуль няма.

Раніцай у нядзелю, 8 сакавіка, стала вядома, што адзін з падазраваных у датычнасці да забойства Барыса Нямцова падарваў сябе гранатай у Грозным. Злачынец, як мяркуецца, быў блакаваны паліцыянтамі ў кватэры аднаго з дамоў на вуліцы Льва Яшына. Ён кінуў адну гранату ў бок супрацоўнікаў паліцыі, а другой падарваў сябе.

Удзень 8 сакавіка Басманны суд Масквы арыштаваў пецярых затрыманых у справе аб забойстве Барыса Нямцова - Заура Дадаева, Хамзада Бахаева, Тамерлана Эскерханава, а таксама Анзора і Шагіда Губашавых. Яны будуць знаходзіцца пад вартай да 28 красавіка.

Суддзя Наталля Мушнікава паведаміла, што Дадаеў ужо даў прызнальныя сведчанні, якія пацвярджаюць ягонае дачыненне да забойства Нямцова. Кажучы пра Анзора Губашава, суддзя дадала, што ягонае дачыненне да забойства Нямцова пацвярджаецца сведчаннямі сведак і фактычнымі матэрыяламі справы.