Мянчук прыпаркаваўся на газоне, бо ён «на джыпе» і яму «ўсё дазволена»

У адным з двароў сталіцы адбыўся канфлікт паміж кіроўцам на джыпе і жыхаром аднаго з навакольных дамоў.

Інцыдэнт адбыўся ў сераду на вуліцы Ураджайнай, недалёка ад Старавіленскага тракту. Надоечы там пачалася будоўля і будаўнічая тэхніка заняла амаль увесь двор, які фармальна належыць да будпляцоўкі. Днямі туды сталі прыязджаць і супрацоўнікі арганізацыі-забудоўшчыка на сваіх асабістых аўтамабілях. З адным з такіх ў чытача charter97.org Георгія Плашчынскага адбыўся непрыемны дыялог: сталася так, што кіроўца разважыў, што «ён VIP, бо ў яго ёсць «джып».

- Адзін такі супрацоўнік будаўнічай кампаніі сёння прыпаркаваў свой джып Mitsubishi Pajero проста ля выхаду з майго дома. Брамка адкрывалася ў двор, таму мы змаглі выйсці, але ў адваротным выпадку яна наўрад ці адкрылася б. Ды і наогул, гэта не этычна, паркавацца так блізка. Недалёка ёсць шмат месца, у тым ліку, тэрыторыя будаб'ектаў. Але не, яму спатрэбілася прыпаркавацца ў зялёнай зоне. Першай выйшла мая мама і ветліва папрасіла перапаркавацца, у адказ на што пачула: «Ды ты хто такая?» і «Чаму я павінен гэта рабіць?». Пачуўшы размову на падвышаных танах, выйшаў і я, а кіроўца наважыўся са мной патузацца. Пагражаў мне бойкай, на што я прыстрашыў яго адказнасцю паводле закону - бойку ён так і не распачаў. З выкарыстаннем лаянкі сцвярджаў, што калі ў яго ёсць джып, то ён усемагутны і яму ўсё дазволена. Джып, трэба сказаць, так сабе, зусім мяне не ўразіў, - распавёў Георгій Плашчынскі.

- Як Вы пазбавіліся ад хулігана?

- Пасля званка ў ДАІ тып сеў у аўто і адразу ўцёк. Інспектары, якія прыбылі параілі звярнуцца з заявай у міліцыю і прыкласці здымкі. Менавіта так я і мае намер зрабіць. Цяпер я рыхтую заяву. Як кажа адзін мой кітайскі сябар, this is magical Belarus. Не магу зразумець, адкуль у Менску ўзяліся ўсе гэтыя шаленцы ды нахабы?

- Ці былі раней у вашым двары канфлікты, звязаныя з няўдалай паркоўкай?

- Паркуюцца там гэтыя людзі з будоўлі ўжо не першы раз. Мала таго, што насупраць дома часта праязджае цяжкая будаўнічая тэхніка (самазвалы ды экскаватары), дык часам яе яшчэ і пакідаюць проста насупраць дамоў. Неяк раз мне нават давялося прасіць ад'ехаць кіроўцу самазвала. А ў суботу раніцай адзін экскаватар, стоячы на дарозе побач з самазвалам, манеўраваў проста побач з нашым плотам. Мы перажывалі, каб нам выпадкова не завалілі плот. А ўсё таму, што ўвесь зямельны надзел (дома 2/11, 4, 6, 8 на вуліцы Ураджайная і 35, 37, 39, 41 на вуліцы Чарвякова) ужо знаходзіцца ў карыстанні забудоўшчыка. Аднак ён вядзе будаўніцтва «з захопам», і таму не хоча разлічвацца з ўласнікамі. Хоць паводле пастановы Менгарвыканкама 2008-га №3026 ён яшчэ да пачатку будаўніцтва трэцяга этапу (у лютым 2014-га) павінен быў разлічыцца з усімі ўласнікамі дамоў, якія трапляюць пад наступны «захоп» і вызваліць будаўнічую пляцоўку ад дамоў.

Вось і ставілі б там свае Pajero колькі хочацца! Была б процьма месца. Але ТАА «Метадос» (забудоўшчык), відавочна, вельмі хоча зэканоміць на кожным шэлегу. Яны нават за дрэвы і хмызнякі грошы дагэтуль не выплацілі (яшчэ ў 2008 годзе ўзгаднілі суму кампенсацыі паводле курсу, за гэты час у 7-8 разоў сум кампенсацыі зменшыўся). Кагадзе Інспекцыя дэпартамента кантролю і нагляду за будаўніцтвам у Менску аштрафавала дырэктара ТАА «Метадос» і прараба будоўлі за парушэнні пры арганізацыі будпляцоўкі.

- Як змагацца з тымі, хто думае, што ім усё можна?

- Метад развязання праблемы з паркоўкай, акрамя захавання пэўных этычных нормаў, зразумелых для кожнага чалавека, а таксама правілаў дарожнага руху - гэта эфектыўны кантроль гарадскіх уладаў, кантрольных органаў і грамадзянскай супольнасці за выкананнем заканадаўства. Дзеянне закона, кожны ведае, што павінен паважаць заканадаўства, пільнавацца правоў ды інтарэсаў іншых, інакш давядзецца сутыкнуцца з наступствамі.

Нагадаем, надоечы паступіла актуальная інфармацыя аб сітуацыі на вуліцы Ураджайнай, дзе з віны ТАА «Метадос» людзі жывуць у старых дамах, якія не падлягаюць рамонту. Жыхары васьмі дамоў, што паступова заняпадаюць праз забарону на іх мадэрнізацыю з прычыны канфіскацыі зямлі, дагэтуль не атрымалі абяцаныя кампенсацыі да пачатку будаўніцтва. Раней таксама паведамлялася аб тым, што жыхары тэрыторыі забудовы патрабуюць спыніць будаўніцтва элітнага жылля.