Тысячы жыхароў Новасібірска выйшлі на мітынг «За свабоду творчасці»
1- 5.04.2015, 16:03
- 10,413
Акцыя прайшла ў сувязі з сітуацыяй вакол Новасібірскага опернага тэатра і пастаноўкі «Тангейзер».
Опера выклікала крытыку мітрапаліта Новасібірскага і Бердскага Ціхана, які звярнуўся ў пракуратуру ў сувязі з тым, што пастаноўка можа абразіць пачуцці вернікаў. Пасля ў сітуацыю ўмяшаўся міністр культуры РФ Уладзімір Мядзінскі, які зняў дырэктара тэатра Барыса Мездрыча, паведамляе BBC.
Прызначаны Мінкультам новы кіраўнік Уладзімір Кехман адмовіўся ад пастаноўкі.
Паводле ацэнкі палітыка Сяргея Мітрохіна, які прыйшоў на акцыю пратэсту, на плошчы сабраліся амаль пяць тысяч чалавек. Пры гэтым у заяўцы на правядзенне мітынгу арганізатары ацэньвалі колькасць удзельнікаў у 2,5 тысячы.
Як паведамляе мясцовае выданне "Тайга.инфо", акторы тэатра не змаглі трапіць на акцыю, нягледзячы на тое, што яна праходзіла наўпрост перад будынкам тэатра. Новы дырэктар Уладзімір Кехман прызначыў на час мітынгу сход творчай часткі калектыву.
На акцыі гучалі, прынамсі, звароты рэжысёра Кірыла Сярэбранікава, журналіста Сяргея Пархоменкі, а таксама протадыякана Андрэя Кураева.
«Мы мяркуем, што зняцце з рэпертуару НДАТОіБ оперы «Тангейзер» і звальненне дырэктара тэатра Мездрыча - гэта дэманстратыўны крок, які стварае небяспечны прэцэдэнт для далейшага ўвядзення цэнзуры ў маштабе ўсёй краіны... Мы выказваем абурэнне тым фактам, што Міністэрства культуры ў канфлікце вакол оперы «Тангейзер» падтрымлівае царква і адмаўляецца абараняць пункт гледжання сваіх грамадзян - падаткаплацельшчыкаў, якія не згодныя з пазіцыяй новасібірскага мітрапаліта Ціхана і падтрымоўваных ім радыкальных актывістаў», - гаворыцца ў тэксце рэзалюцыі мітынгу.
Удзельнікі акцыі таксама патрабавалі адстаўкі Мядзінскага ў сувязі з ягоным «нежаданнем прымаць пад увагу існую ў грамадстве сістэму каштоўнасцяў», а таксама ягоным непаважлівым стаўленнем да меркавання грамадзян і дзеячаў культуры.
Акрамя таго, у рэзалюцыі гаворыцца пра неабходнасць перагледзець артыкул Крымінальнага кодэксу аб абразе пачуццяў вернікаў. На думку ўдзельнікаў акцыі, яе дзеянне не павінна распаўсюджвацца на мастацкія творы.
