Генеральны сакратар NATO: Расея парушае Менскія пагадненні аб Украіне

Масква прадаўжае падтрымліваць сепаратыстаў сучаснай тэхнікай, сістэмамі СПА, танкамі.

Пра гэта заявіў у інтэрв'ю журналістам El Pais і яшчэ некалькіх еўрапейскіх газет генеральны сакратар NATO Енс Сталтэнбэрг. Журналістка Люцыя Абэльян адзначае, што гаворка ішла не толькі пра расейскую пагрозу, але і пра нестабільнасці ў краінах на поўдзень ад ЕЗ, асабліва ў Лівіі, піша Инопресса.ру.

- На ваш погляд, якія намеры Пуціна ў абставінах пасля Менскіх дамоўленасцей?

- Менскія дамоўленасці - найлепшая аснова для заключэння міру шляхам перамоваў, але мы назіралі іх парушэнні, а таксама вялікую колькасць загінулых з прычыны гэтых парушэнняў. Расея нясе асаблівую адказнасць, бо яна прадаўжае падтрымліваць сепаратыстаў сучаснай тэхнікай, сістэмамі СПА, танкамі... У іх таксама ёсць сілы на ўсходзе Украіны, якія дапамагаюць сепаратыстам. Усё гэта парушае Менскія пагадненні і шкодзіць спробам дасягнуць палітычныя пастановы шляхам перамоваў.

- Як вы думаеце, Пуцін можа паспрабаваць прабіць калідор праз Украіну, каб атрымаць прамы доступ да Крыма?

- Заўсёды цяжка меркаваць, што здарыцца далей, але мы бачым тое, што Расея зрабіла дагэтуль. Яна шмат уклала ў абарону, і моц ў яе ёсць. Мы абавязаны рэагаваць, калі бачым такія дзеянні. І NATO рэагуе.

- NATO прыпыніла супрацоўніцтва з Расеяй, але хоча прадаўжаць палітычны дыялог. Ці існуе нейкая «лінія ў пытаннях бяспекі», якая звязвае Еўропу і Маскву?

- Мы пакідаем адкрытымі каналы вайсковых кантактаў і вывучаем унутраныя працэдуры, якія гарантавалі б іх функцыянаванне. Справа ў тым, што ўзрасла рызыка непаразуменняў, сітуацый, якія могуць вырвацца з-пад кантролю.