Беларусь адмовілася падпісаць дэкларацыю «Усходняга партнёрства» праз Крым

Беларусь і Арменія не падпісалі выніковую заяву саміту «Усходняга партнёрства», бо ў ёй была фраза аб акупацыі Крыма.

Пра гэта, як піша «Украинская правда», паведамляе Reuters са спасылкай на дыпламатычныя крыніцы.

Фраза аб незаконнай анэксіі паўвыспы Расеяй змяшчалася ў першапачатковым тэксце дакумента. Праз пазіцыю Менска і Ерэвана, паводле інфармацыі агенцтва, будзе выпрацаваная кампрамісная заява, у якой пазіцыя Еўразвязу і краін-удзельніц «Усходняга партнёрства» (Украіна, Малдова, Азербайджан, Арменія, Грузія і Беларусь) будуць прадстаўленыя асобна.

У дакуменце, паводле звестак агенцтва, будзе гаворыцца пра тое, што Еўразвяз асуджае анэксію Крыма. У ім таксама будуць пазначаныя пазіцыі ўсіх шасці былых савецкіх рэспублік, выказаныя імі падчас галасавання ў ААН паводле рэзалюцыі, якая асуджае крымскі рэферэндум.

Нагадаем, Генасамблея ААН падтрымала рэзалюцыю, у тэксце якой прызнаецца непарушнасць тэрытарыяльнай цэласнасці Украіны. За адпаведную рэзалюцыю прагаласавалі 100 краін-сябраў ААН. Супраць прагаласавалі 11 краін: разам з Расеяй прагаласавалі толькі Арменія, Беларусь, Балівія, Куба, КНДР, Нікарагуа, Судан, Сірыя, Зімбабвэ, Венесуэла.

Форум «Усходняга партнёрства» пройдзе ў Рызе 21-22 траўня 2015 года. Афіцыйны Менск уяўляе дэлегацыя на чале з міністрам замежных спраў Уладзімірам Макеем. Можна ўважаць прадстаўніцтва Беларусі на саміце Усходняга партнёрства фармальным. Хоць да апошняга моманту арганізатары чакаюць у Латвіі прыезду вышэйшага беларускага кіраўніцтва.