Украінскі дыпламат: Санкцыі супраць РФ за Грузію прадухілілі б анэксію Крыму
6- 26.05.2015, 19:12
- 35,875
Анэксіі Крыму і вайны на Данбасе можна было б пазбегнуць, калі б Захад увёў жорсткія санкцыі супраць Расеі яшчэ ў 2008 годзе, калі яна акупавала частку Грузіі.
Пра гэта заявіў амбасадар Украіны ў Тбілісі Васіль Цыбенка ў інтэрв'ю Georgianreview, піша "Апостраф".
"Чым больш я назіраю за падзеямі, тым больш я схільны думаць, што калі б Захад не абмежаваўся рэзалюцыямі і заявамі з нагоды грузінска-расейскай вайны ў жніўні 2008 года і зрабіў бы больш радыкальныя захады, Расея б не адважылася анэксаваць Крым і весці вайну супраць Украіны", - адзначыў дыпламат.
Пры гэтым ён падзякаваў Захаду за падтрымку Украіны.
"Сітуацыя ва Украіне была б радыкальна іншай, калі б не падтрымка і намаганні Захаду. Было цалкам відавочна з самага пачатку, што дзеянні Расеі накіраваныя на раскол краіны", - адзначыў пасол.
Цыбенка заклікаў Захад узмацніць санкцыі супраць Расеі, бо яна прадаўжае агрэсію супраць Украіны.
"Эканамічныя і палітычныя санкцыі, накладзеныя на Расею, павінны быць не толькі захаваныя, але і ўзмоцненыя. Гэта павінна быць зроблена для таго, каб устанавіць мір ва Украіне і рэгіёне. Крэмль павінен усвядоміць, што парушэнне міжнародна прызнаных нормаў не застанецца без адпаведнай рэакцыі цывілізаванага свету", - падкрэсліў дыпламат.