Лукашэнка: Еўрапейцы зайздросцяць беларускім аграрыям

Правадыр сустрэўся з фермерамі ў аграгарадку «Александрыя» Шклоўскага раёна Магілёўскай вобласці.

Лукашэнка нагадаў, з чаго пачыналася развіццё аграрнага сектара: недахоп сродкаў, недахоп сельгаспрадукцыі. А сёння, заўважыў ён, забяспечаная харчовая бяспека краіны, Беларусь імкнецца выйсці на экспарт сельгаспрадукцыі ў 7 мільярдаў даляраў, піша БелаПАН.

Дыктатар таксама ўспомніў, як у свой час яму прапаноўвалі раздаць зямлю ў прыватную ўласнасць. «Вы ведаеце маю пастанову - я быў катэгарычна супраць. І пабываўшы сёння ў паспяховых фермераў Шклоўскага раёна, у людзей, з якімі я працаваў, якіх я добра ведаю, пераканаўся, што тады мы абсалютна правільна паступілі», - сказаў ён.

Калі б тады раздалі зямлю, наступствы былі б сумнымі, мяркуе Лукашэнка. Паводле ягоных слоў, шмат негатыўных момантаў такой прыватызацыі сёння можна ўбачыць у суседняй Расеі і нават Еўропе.

Важным крокам у развіцці вёскі, на думку кіраўніка дзяржавы, стала стварэнне сельскагаспадарчай тэхнікі - ад шырокай лінейкі трактароў, навясных агрэгатаў да камбайнаў.

«Пытанне якасці застаецца сур'ёзным, але на гэта мы сёння звяртаем асаблівую ўвагу. Тым не менш, наша тэхніка, і гэта паказвае практыка, можа працаваць эфектыўна. Для гэтага толькі патрэбныя веды і ўмельства. А бо тады было шмат і супраціўнікаў гэтай ідэі. Некаторыя прапаноўвалі ўсю тэхніку купляць у Нямеччыне. А зараз я думаю, калі б мы пайшлі тым шляхам, то магло апынуцца так, што і хлеб бы няма чым было прыбіраць. Гэта значыць, мы прайшлі вялікі, цяжкі шлях развіцця вёскі, уклаўшы ў яго развіццё за апошнія дзесяць гадоў больш за 45 мільярдаў даляраў», - заявіў Лукашэнка.

Сёння, сцвярджае ён, нават еўрапейцы зайздросцяць беларускім аграрыям, паколькі ў Еўропе далёка не ўсе фермеры могуць дазволіць сабе працаваць на такіх вялікіх плошчах зямлі, паколькі зямля прыватная і канкурэнцыя вельмі жорсткая - кожны прыватнік змагаецца за сваю зямлю, імкнучыся атрымаць са свайго шматка максімум выгады .

«Напэўна, тады мы прынялі правільную пастанову, і я не думаю, што ад яе трэба адмаўляцца. Тады ж мною было прынятая пастанова не перашкаджаць развіццю фермерскага руху. І калі яшчэ некалькі гадоў таму былі абмежаванні на карыстанне зямлёй, то сёння яны знятыя. І сёння нармальная сітуацыя, калі фермеру аддаюць сельгасугоддзі, якія неэфектыўна выкарыстоўваюцца», - сказаў ён.

Што тычыцца пытання прыватнай уласнасці на зямлю, то, на думку Лукашэнкі, уводзіць яе ў Беларусі яшчэ заўчасна. «Мы гэтае пытанне будзем разглядаць. Калі гэта пры мне будзе, то я гарантую, што вы будзеце першымі, хто атрымае права прыватнай уласнасці на зямлю. Я кажу гэта не таму, што я з вамі сустракаюся, а таму што вы даказалі сваёй працай, што гэта ваша зямля», - сказаў ён.

На думку Лукашэнкі, тут пытанне перш за ўсё ў псіхалогіі. «Давайце не будзем тут спяшацца. Прыйдзе час, і гэтае пытанне будзе развязанае. Галоўнае, каб цяпер людзі не баяліся прыйсці на арандаваную зямлю, былі ўпэўненыя, што ў іх яе ніхто не забярэ. Калі ў нас заканадаўства ў гэтым плане не хапае, мы яго дапоўнім. Галоўнае - непахіснасць права прыватнай уласнасці», - падкрэсліў ён.