Раман Васілюк першым у чэмпіянаце Беларусі дасягнуў мяжы ў 100 галявых перадач
2- 4.05.2015, 14:21
- 3,635
36-гадовы форвард берасцейскага «Дынама» Раман Васілюк стаў першым футбалістам, якому ўдалося зрабіць сто галявых перадач у матчах чэмпіянату Беларусі.
Гэта здарылася 3 траўня на полі спарткомплексу «Берасцейскі» ў матчы чацвёртага тура чэмпіянату Беларусі супраць «Віцебска», піша БелаПАН.
Берасцейцы, гуляючы з 20-й хвіліны матчу ў меншасці пасля выдалення Паўла Чалядкі, атрымалі валявую перамогу з лікам 3:2. Васілюк аддаў галявы пас Кірылу Прамудраву на 53-й хвіліне гульні.
Прамудрў забіў у гэтым чэмпіянаце свой чацвёрты гол і выйшаў у найлепшыя бамбардзіры чэмпіянату. Васілюк таксама трапіў у браму «Віцебска», забіўшы свой 209-ы мяч у рамках чэмпіянатаў Беларусі.
Найбліжэйшыя пераследнікі Васілюка ў гонцы асістэнтаў ужо скончылі гульнявую кар'еру і далёка адстаюць ад берасцейца: 90 галявых перадач на рахунку Віталя Валадзянкова, 85 раз асіставаў партнёрам Ігар Чумачэнка, 79 - Андрэй Разін.
«Я не надаю асаблівага значэння сваім дасягненням. Проста гуляю ў футбол, - заявіў Раман Васілюк пасля гульні з «Віцебскам». - Галоўнае, што сёння каманда праявіла характар і дамаглася перамогі».