ЗША адправілі ў Грузію цяжкую вайсковую тэхніку
4- 4.05.2015, 21:38
- 9,467
У сувязі з набліжэннем вайсковых вучэнняў ЗША адправілі ў Грузію цяжкую вайсковую тэхніку.
Пра гэта паведамляе "Новости-Грузия" са спасылкай на афіцыйны сайт амэрыканскага войска.
Грузінска-амэрыканскія вучэнні Noble Partner пройдуць на вайсковым аэрадроме і палігоне Вазіяні (блізу Тбілісі). У вучэннях, якія афіцыйна стартуюць 11 траўня, возьмуць удзел блізка што 600 амэрыканскіх і грузінскіх вайскоўцаў з роты "Альфа" 12-га батальёна першай пяхотнай брыгады УС Грузіі, першай механізаванай роты 42-га батальёна чацвёртай механізаванай брыгады і звязу вайсковай паліцыі.
"Такога кшталту перасоўванні з Варны (Балгарыя) праз Чорнае Мора да порта Батумі расхінаюць новыя магчымасці для транспартавання (грузаў - заўв. рэд.) паміж партнёрамі. Павелічэнне свабоды перасўвання палягчае даступнасць вучэнняў з партнёрамі, таксама як і хуткае рэагаванне на надзвычайныя аперацыі", - заявіў старшы падафіцэр войска ЗША Марк Шавэн (Mark Shawen).
Як адзначылі ў міністэрстве абароны Грузіі, мэтай вучэнняў з'яўляецца падвышэнне гатовасці ўдзелу ў будучых аперацыях NATO.
"Вучэнні ўпершыню праводзяцца ў Грузіі і ставяць перад сабой мэту збліжэння грузінскай роты з сіламі хуткага рэагавання NATO, а таксама падвышэнне гатовасці ўдзелу ў будучых аперацыях і вучэннях NATO ", - гаворыцца ў паведамленні.