У супермаркеты Берліна праз памылку даставілі 400 кілаграмаў какаіну

Агульны кошт канфіскаванай партыі ацэнены ў 15 млн. еўраў.

У Берліне ў 13 супермаркетаў сеткі Aldi памылкова была дастаўленая буйная партыя какаіну. Як паведамляе Bild, наркотык быў схаваны ў скрынкі з калумбійскімі бананамі. Какаін быў расфасаваны ва ўпакоўкі па адным кілаграме. Агульны кошт канфіскаванай партыі ацэнены ў 15 млн. еўраў. Узровень чысціні какаіну склаў 80%, што з'яўляецца паказчыкам высокай якасці наркотыку, піша «Лiга.нет».

Следства мяркуе, што партыю не планавалі дастаўляць у Берлін, але куды накіроўвалася пасылка, пакуль не вядома.

Як адзначае выданне, гэта не першы выпадак памылковай адпраўкі какаіну ў супермаркеты Aldi - у студзені 2014 такім жа чынам у крамы трапіла 140 кг наркотыку.