Лукашэнка: Ні ў якім выпадку нельга дапусціць страты буйных прамысловых прадпрыемстваў
78- 6.05.2015, 12:53
- 25,225
Дыктатар патрабуе прыняцця захадаў у захаванні працоўных калектываў на прадпрыемствах.
Такую задачу Аляксандр Лукашэнка паставіў 5 траўня, прымаючы з дакладам міністарку працы і сацыяльнай абароны Мар'яну Шчоткіну. Пра гэта сайту charter97.org паведамілі ў прэс-службе кіраўніка.
«Гэтая праблема больш за ўсё тычыцца міністра прамысловасці, - сказаў Лукашэнка. - Але хацеў бы і вас папярэдзіць, каб вы ва ўрадзе за гэтым пытаннем паназіралі і правялі кантроль. У нас на некаторых даволі буйных прадпрыемствах праз пэўныя прычыны, не буду іх называць, мы ўжо не аднойчы пра гэта казалі, склалася вельмі напружаная сітуацыя, абставіны. Мы ні ў якім выпадку не павінны дапусціць таго, каб іх страціць».
Са слоў Лукашэнкі, для гэтага трэба правесці комплекс захадаў.
«Міністру прамысловасці была пастаўленая жалезная ўмова: захаваць працоўныя калектывы, - сказаў ён. - І калі мы дзесьці там захраслі на нейкім этапе, то цягам лета, да верасня людзі ж выйдуць з адпачынку, які ў іх настрой, вы добра разумееце, ім патрэбная праца, ім патрэбны заробак, дзяцей у школу адпраўляць, сям'ю карміць , гэта вельмі важна. Таму пытанне нумар адзін - захаваць працоўныя калектывы, а каб іх захаваць, трэба, каб людзі працавалі».