Работнікаў «Полацкводаканала» прымушаюць карыстацца паслугамі прадпрыемства

Начальства прадпрыемства запэўнівае, што крыміналу ў гэтым няма і скаржнікаў проста «душыць жаба».

Чытач charter97.org распавёў пра новаўвядзенні на «Полацкводаканале».

«Я жыву ў горадзе Полацку і працую на мясцовым прадпрыемстве УП «Полацкводаканал». Само прадпрыемства знаходзіцца на ўскраіне горада і акружанае прыватным сектарам. Адпаведна, палова простых супрацоўнікаў пражывае менавіта ў гэтым сектары. Нядаўна начальства прыдумала спосаб папаўнення даходаў прадпрыемства. Месяц таму мясцовым працоўным прынеслі на подпіс нейкія дамовы (якія нібыта ні да чаго не абавязваюць, простая фармальнасць) на тое, што калі рабочым спатрэбіцца адпампоўваць каналізацыйныя адыходы, то яны звернуцца за паслугай на свой родны водаканал. З пагрозамі звальнення прымусілі падпісаць.

Цяпер жа прымусова (пакуль на словах) прымушаюць работнікаў выклікаць для сябе спецтэхніку раз у месяц і адпампоўваць свой каналізацыйны бруд, прычым аб'ём адпампавання павінен быць роўны аб'ёму месячнага спажывання вады. Кожны дзень ходзяць і нагадваюць, што трэба як мага хутчэй развязваць пытанне. Некаторым нават тэлефануюць на мабільны і таксама нагадваюць, прычым з пагрозамі. У выпадку адмовы пагражаюць выклікаць санэпідстанцыю, адключыць ваду або папросту пагражаюць звальненнем.

Людзям далі невялікі тэрмін. Кажуць, што нават неабавязкова менавіта адпампоўваць, дастаткова каб тэхніка прыехала па адрасе і хаця б проста пастаяла побач - ты галоўнае грошы заплаці. Ці мае права кіраўніцтва прадпрыемства такімі метадамі ціснуць на людзей і як рабочым найлепш паступіць у гэтай сітуацыі? Ці можна папросту ігнараваць гэтыя загады? Нас такіх шмат, людзі запалоханыя і не ведаюць што рабіць. Не магу кожны дзень глядзець, як напарнікам ходзяць і тыкаюць, каб хутчэй адпампоўвалі. Усе работнікі спраўна штомесяц плацяць за водазабеспячэнне. Чаму яны абавязаныя адпампоўваць каналізацыю штомесяц, калі большасці досыць гэта рабіць раз на паўгода? На людзей, якія не працуюць на прадпрыемстве, але пражываюць у гэтым жа прыватным сектары, ціску ніякага не робіцца, але гэта, хутчэй за ўсё, пытанне часу, - скардзіцца чытач.

Галоўны інжынер «Полацкводаканала» Міхаіл Аліхвер растлумачыў charter97.org, што крыміналу ў сітуацыі ніякага няма, а скаржнікаў проста «душыць жаба».

«Не трэба распавядаць казкі. Я сам жыву ў прыватным доме і ў мяне ў самога ёсць такая дамова. Усё законна. Зразумейце, калі чалавек спажывае па лічыльніку 20 кубаметраў вады ў месяц, куды сыходзяць сцёкі? На прыроду? Значыць, пакутуе экалогія, значыць, чалавек дзесьці хітруе, парушае. Раней, у 60-я гады водаправоды наогул былі без каналізацыі, сцёкі ў кюветы вывозіліся. Цяпер больш жорсткае прыродаахоўнае заканадаўства і гэта цяпер недапушчальна. Выграб павінен быць герметычны. А для гэтага трэба адпампоўваць. А атрымліваецца, што чалавек спажывае 20 кубаметраў, а адпампоўваць няма чаго. Чаму мы пачалі са сваіх? Многія нашы супрацоўнікі жывуць у прыватных дамах. Мы прымушаем людзей рабіць выграбанні ва ўсім горадзе, таму да сваіх асаблівая ўвага. Ніхто не крычаў, што кагосьці будзем звальняць. Для сваіх у нас нават зніжка 50%. Гэтыя сцёкі адпампоўваюць у гарадскую каналізацыю і адпраўляюць на ачышчальныя збудаванні. Усё, як патрабуе закон. Крыміналу тут ніякага. Я разумею, можа быць, кагосьці «жаба душыць». Грошы невялікія, але, усё ж такі, грошы. Лепш кудысьці ў канаву зліць, праўда? Але паводле закону выграб павінен быць герметычны», - распавёў галоўны інжынер прадпрыемства.