Міністр фінансаў Нямеччыны: Грэцыі не варта спадзявацца на Расею і Кітай
- 7.05.2015, 11:01
- 3,219
Грэцыі не варта спадзявацца на тое, што Расея або Кітай дадуць ёй фінансавую дапамогу, якая дазволіць краіне выйсці з пазыковага крызісу.
Пра гэта заявіў у Берліне ў сераду міністр фінансаў Нямеччыны Вольфганг Шойбле, Deutsche Welle.
«Ніхто ў свеце не гатовы нават часткова развязаць праблемы Грэцыі», - сказаў ён.
Фінансавую дапамогу Масквы Афінам кіраўнік нямецкага Мінфіна ўважае малаімавернай, бо Расея, растлумачыў ён, сама сутыкнулася з сур'ёзнымі эканамічнымі праблемамі, выкліканымі падзеннем коштаў нафты і газу.
Акрамя таго, становішча РФ узмацняецца прынятымі супраць яе еўрапейскімі санкцыямі, абвалам рубля і паслабленнем даверу міжнародных крэдытораў, нагадаў Шойбле.
Што ж тычыцца КНР, то кітайцы «не даюць грошай задарма», заявіў міністр фінансаў ФРГ.
Са слоў Вольфганга Шойбле, Нямеччына і Еўропа агулам гатовыя і далей дапамагаць Грэцыі.
Але гэтая дапамога мэтазгодная толькі пры ўмове, што самі грэкі выкарыстоўваюць наяўны ў іх распараджэнні час, каб «зноў паставіць сваю краіну на ногі ў фінансавым сэнсе», папярэдзіў Шойбле.