Добрушская папяровая фабрыка: Кітайскія працоўныя не з'яўляюцца нашымі супрацоўнікамі

Заробак збунтаваным кітайскім будаўнікам павінен плаціць падрадчык - карпарацыя «Сюань Юань».

Паводле інфармацыі беларускіх карыстальнікаў сацыяльных сетак, з Добруша ў бок Гомля прайшла калона кітайскіх рабочых колькасцю амаль 300 чалавек. Як стала вядома пазней, гэта будаўнікі, якія працуюць на ўзвядзенні новага комплексу Добрушскай папяровай фабрыкі «Герой працы».

Галоўны бухгалтар Добрушскай папяровай фабрыкі «Герой працы» Вольга Калініна ў каментары сайту charter97.org патлумачыла, што прадпрыемства з'яўляецца проста заказчыкам будаўнічых работ і не мае ніякага дачынення да аплаты працы кітайскіх рабочых.

«Кітайскія рабочыя робяць нам аб'ект «пад ключ». Пытанні заробкаў развязвае іх кіраўніцтва - беларускае прадстаўніцтва карпарацыі «Сюань Юань». Менавіта яны з'яўляюцца нашым падрадчыкам і выплачваюць заробак сваім працоўным. Мы да гэтага не маем ніякага дачынення», - паведаміла галоўны бухгалтар.

Карпарацыя «Сюань Юань» з'явілася на беларускім рынку ў канцы 2006 года і была прадстаўленая ў айчынных СМІ як «першая прыватная кітайская інвестыцыйная кампанія», зацікаўленая ў інвестыцыях у будаўніцтва, дрэваапрацоўчую, мэблевую прамысловасць. 26 снежня 2006 падчас візіту ў Беларусь дэлегацыі «Сюань Юань» на чале з віцэ-прэзідэнтам кампаніі Сюе Хайлун адбыліся перамовы з кіраўніцтвам канцэрна «Беллеспаперапрам», ЗАТ «Пінскдрэў», шэрагам мэблевых фабрык, прадпрыемства «Санта-Брэмар», а таксама з адміністрацыяй свабоднай эканамічнай зоны «Брэст».

А ў жніўні 2014 было абвешчана аб маштабным інвестыцыйным праекце ў цэлюлозна-папяровай прамысловасці - будаўніцтве на базе Добрушскай папяровай фабрыкі «Герой працы» завода ў вытворчасці мелаванага і немелаванага кардона магутнасцю 200 тысяч тон на год. Рэалізацыя гэтага праекта праводзіцца за кошт прыцягнення крэдытных рэсурсаў КНР у аб'ёме 348,6 млн даляраў ЗША. Генеральным падрадчыкам выканання праекта «пад ключ» была вызначаная кітайская кампанія карпарацыя «Сюань Юань». Увод завода ў эксплуатацыю намечаны на снежань 2015 года З выхадам завода да канца 2017 на праектныя магутнасці яго аб'ём вытворчасці складзе прыблізна 345,5 млн даляраў ЗША.

Адміністрацыя менскага офіса «Сюань Юань», размешчанага ў Менску па вуліцы Старажоўская 5-38, на званкі карэспандэнта charter97.org ніяк не адрэагавала. Тэлефон паставілі на рэжым аўтаадказніка.