Мэркель пераабраная кіраўніцай ХДУ
- 6.12.2016, 18:53
- 18,164
За кандыдатуру канцлеркі Нямеччыны прагаласавалі 89,5% дэлегатаў партыйнага з'езда ў Эсэне.
Ангела Мэркель кіруе партыяй амаль 17 гадоў. Раней яна заявіла аб намеры ў 2017 годзе зноў вылучыць сваю кандыдатуру на пасаду канцлера Нямеччыны, перадае ВВС.
Ёй давядзецца змагацца з ростам папулярнасці партыі еўраскептыкаў «Альтэрнатыва для Нямеччыны», якая здолела перавабіць сабе галасы прыхільнікаў іншых партый.
На вераснёўскіх выбарах у рэгіянальны парламент Бэрліна партыя ХДУ пацярпела самую сур'ёзную паразу за апошнія 26 гадоў, набраўшы 17,6% галасоў.
Мэркель ўзяла на сябе адказнасць за паразу партыі, адным з чыннікаў якой, з ейных слоў, стала палітыка «адчыненых дзвярэй» у дачыненні да мігрантаў.
«Калі б я магла, я б павярнула час назад - на шмат, шмат гадоў», - заявіла Мэркель, выказаўшы шкадаванне, што ва ўрада не было больш часу, каб падрыхтавацца да наплыву мігрантаў у Еўропе.
Шмат хто з назіральнікаў уважае вынікі рэгіянальных выбараў за важны індыкатар настрояў у Нямеччыне напярэдадні выбараў у бундэстаг 2017 года.