У менскім скверы Котаўка зноў сякуць дрэвы
20- 7.12.2016, 9:38
- 18,999
Супрацоўнікі «Зелянбуда» раніцай 7 снежня працягнулі высечку дрэў у сталічным скверы Котаўка у Сельгаспасёлку.
Пра гэта паведаміла БелаПАН прадстаўнік экалагічнага таварыства «Зялёная сетка» Марына Дубіна.
«Яны прыехалі ў сем раніцы і ў цемры пачалі секчы. Ужо паспелі ссекчы два дрэвы. Вядуць сябе вельмі агрэсіўна — пхаюцца, лаюцца», — распавяла Дубіна.
Высечка дрэў у скверы Котаўка пачалася 6 снежня, але пад ціскам эколагаў і мясцовых жыхароў была спыненая. Было ссечана два дрэвы, яшчэ адно — не цалкам.
Як раней паведамлялася, абшчыне «Рымска-каталіцкі прыход святых апосталаў Пятра і Паўла і святога Яўгена дэ Мазено» ў кастрычніку выдалі новы дазвол на вытворчасць будаўніча-мантажных работ у скверы Котаўка ў Сельгаспасёлку.
Раней мясцовыя жыхары сабралі больш за 500 подпісаў пад зваротам супраць забудовы сквера Котаўка, а таксама пад заклікам да забудоўшчыкам разгледзець альтэрнатыўныя пляцоўкі для будаўніцтва. Жыхары і актывісты таксама звярталіся ў выканкам, у Менгарвыканкам і наўпрост да кіраўніка каталіцкай царквы Тадэвуша Кандрусевіча, якога прасілі выбраць іншае месца для будаўніцтва.
Сёння ініцыятыўная група жыхароў Сельгаспасёлку плануе абмеркаваць праблемы забудовы пасёлка і сквера Котаўка на прыёме ў старшыні Менгарвыканкама Андрэя Шорца.