Чарговага чыноўніка-хабарніка прызначылі кіраваць прадпрыемствам
14- 2.02.2016, 17:17
- 26,177
Экс-дырэктара ААТ «Магілёўдрэў», асуджанага за крадзяжы, датэрмінова вызвалілі ды прызначылі кіраўніком праблемнага завода.
Былы гендырэктар ААТ «Магілёўдрэў» Андрэй Вусаў быў асуджаны на 8 гадоў пазбаўлення волі за злоўжыванне службовымі паўнамоцтвамі, а таксама службовы падлог, крадзяжы, прычыненне шкоды ў буйным памеры. 2 лютага стала вядома, што Усаў датэрмінова вызвалены і прызначаны выканаўчым дырэктарам вытворчасці на праблемным магілёўскім прадпрыемстве «Строммашына», паведамляе сайт naviny.by.
Інфармацыю пра гэта пацвердзілі ў адміністрацыі завода.
«Вусаў сёння першы дзень у нас працуе. Мы не ведаем пакуль нумар ягонага асабістага тэлефона. Сёння для яго рыхтуюць кабінет», - паведамілі на прадпрыемстве.
Яшчэ ў снежні 2012 года Аляксандр Лукашэнка, наведваючы «Магілёўдрэў» у рамках кантролю за ходам мадэрнізацыі дрэваапрацоўчых прадпрыемстваў, заявіў, што «мы яшчэ асобна будзем разбірацца з гэтым Вусавым».
1 ліпеня 2014 года Андрэю Вусаву судом Ленінскага раёна Магілёва быў вынесены прысуд. Паводле звестак следства, з загаду былога гендырэктара замежнай фірме аплацілі мантажныя працы новай лініі, якія фактычна былі выкананыя толькі часткова. Таксама Вусаў карыстаўся матэрыяльнымі рэсурсамі прадпрыемства ў асабістых мэтах, выкарыстаў у сваіх інтарэсах транспарт і выкрадаў прадукцыю. Акрамя таго гендырэктар «Магілёўдрэва» займаўся прыпіскамі.
Гэта ўжо трэці выпадак за апошні час, калі асуджаныя за службовыя і эканамічныя злачынствы чыноўнікі і топ-мэнэджары датэрмінова выходзяць на свабоду і прызначаюцца на кіроўныя пасады.
Так, Аляксандр Лукашэнка асабіста памілаваў былога намесніка генеральнага пракурора Аляксандра Архіпава, які ў 2014 годзе быў асуджаны на 6 гадоў пазбаўлення волі за атрыманне хабару - за бутэльку каньяку і залаты злітак дапамог пазбегнуць суда п'янаму кіроўцу, вінаватаму ў смерці пасажыра. Цяпер Архіпаў ўзначальвае сельгаспрадпрыемства пад Смалявічамі.
16 студзеня стала вядома, што былы старшыня Чашніцкага райвыканкама Уладзімір Булай прызначаны на пасаду дырэктара ААТ «Кляновічы» ў Крупскім раёне.
У пачатку верасня 2015 года Генеральнай пракуратурай у дачыненні да Булая была распачатая крымінальная справа аб карупцыі.
Аляксандр Архіпаў выказаў здагадку, што яго вызвалілі, бо Лукашэнка даручыў скласці цэлы спіс асуджаных кіраўнікоў, каб даць ім новую працу.