Мядзведзеў прапанаваў «адзінаросам» адмовіцца ад кампенсацыі заробкаў
7- 6.02.2016, 12:13
- 33,857
Прэм'ер-міністр Расеі таксама разлічвае, што дзяржкампаніі знізяць неабгрунтаваныя выдаткі.
Прэм'ер-міністр Расеі Дзмітрый Мядзведзеў прапанаваў дэпутатам-«адзінаросам» адмовіцца ад кампенсацыі заробкаў праз датэрміновае спыненне іх паўнамоцтваў у сувязі з выбарамі, паведамляе «Интерфакс».
«Мяркую, што і дэпутаты Дзяржаўнай Думы ад «Адзінай Расеі» не павінны заставацца ўбаку. І маглі б адмовіцца ад кампенсацыі заробкаў у сувязі з датэрміновым спыненнем сваіх паўнамоцтваў праз перанос выбараў», - сказаў ён, выступаючы на з'ездзе партыі.
Мядзведзеў адзначыў, што некаторыя дэпутаты хацелі замацаваць такую ініцыятыву на заканадаўчым узроўні. «Але ніхто не забараняе сябрам Дзяржаўнай Думы прыняць такую пастанову самастойна», - адзначыў прэм'ер.
Прэм'ер-міністр Расеі таксама разлічвае, што дзяржкампаніі ў няпростых эканамічных умовах будуць зніжаць неабгрунтаваныя выдаткі.
«Пазбягаць неабгрунтаваных выдаткаў - неабходна. Спадзяюся, мяне пачулі, у тым ліку, у дзяржкампаніях і дзяржкарпарацыях», - сказаў ён.
Мядзведзеў адзначыў, што «эканомія павінна пачынацца, перш за ўсё, з самой дзяржавы».
«На 10 адсоткаў мы скарацілі дзяржапарат - зразумела, без шкоды якасці працы. Летась заробкі дзяржслубоўцаў былі скарочаныя на 10 адсоткаў, - заявіў прэм'ер. - Выдаткі на дзяржапарат і сёлета будуць скарочаныя на 10 адсоткаў».