Аляксандр Бухвостаў: Уладам дорага абыдзецца ўціск правоў працоўных

Толькі салідарнасць працоўных можа прымусіць рэжым біць адбой.

Сёння, 30 чэрвеня, «дэпутаты палаткі» плануюць замацаваць у Працоўным кодэксе нормы дэкрэта №29, узаконіць пагалоўную кантрактызацыю ў краіне, і дэкрэта №5, што істотна пагоршыў умовы працы работнікаў, піша praca-by.info. Як на гэта адрэагавалі незалежныя прафсаюзы?

Генадзь Фядыніч, старшыня прафсаюза РЭП: «Пытанне аб скасаванні кантрактаў актуальнасці не страціць»

- Чаму вырашылі ўнесці нормы дэкрэтаў у Працоўны кодэкс цалкам відавочна. Паводле нашага заканадаўства ўказы і дэкрэты прэзідэнта не могуць быць даўгавечнымі. Зразумела, што дэпутаты Палаты прадстаўнікоў наважылі ўнесці змены ў Працоўны кодэкс перад заканчэннем паўнамоцтваў не на сваю ініцыятыву, а на каманду з Адміністрацыі прэзідэнта. Улады наважылі напляваць на пункт гледжання Міжнароднай арганізацыі працы (МАП) і робяць усё на злосць не толькі незалежным прафзвязам, але і прафзвязам, якія ўваходзяць у ФПБ (хоць тыя прамаўчаць).

Але нават калі ўшчамляюць правы работнікаў нормы замацуюць у Працоўным кодэксе, гэта не скасуе таго, што яны супярэчаць міжнародным канвенцыям, якія ратыфікавалі Беларусь. Пытанне аб скасаванні кантрактаў актуальнасці не згубіць.

А дэпутатам Палаты прадстаўнікоў трэба памятаць, што імёны якія бралі ўдзел у галасаванні будуць усім вядомыя. І мы зробім так, каб народ ведаў сваіх "герояў". Асабліва тых, хто наважыць балатавацца на новы тэрмін. Проста так дэпутатам і ўлады гэта з рук не сыдзе.

Аляксандр Бухвостаў, старшыня Свабоднага прафсаюза металістаў: «Варта чакаць непрыемных для беларускіх уладаў наступстваў»

- Дзеянні ўладаў вытлумачальныя. Нормы дэкрэтаў супярэчылі Працоўнаму кодэксу. Мы біліся за скасаванне дэкрэтаў, але ўлады наадварот наважылі замацаваць іх становішча ў Працоўным кодэксе. Працягваецца мэтанакіраваная палітыка закабалення рабочых і недапушчэння магчымасці праявы іх пратэстнага настрою.

Незразумела, на што разлічваюць улады, ідучы на абвастрэнне стасункаў з МАП, у рэкамендацыях якой чорным па беламу гаворыцца пра неабходнасць скасавання палажэнняў, якія ўтрымліваліся ў дэкрэтах №29 і №5. Магчыма, яны мяркуюць, што ў сувязі з наладжваннем палітычных стасункаў з Захадам, там на гэта закрыюць вочы.

Але думаю, варта чакаць негатыўнай рэакцыі МАП і непрыемных для беларускіх уладаў наступстваў.

Ці стане цяпер складаней дамагчыся скасавання палажэнняў, што ўшчамляюць правы працоўных? Працэдурна так, бо раней для гэтага патрабаваўся толькі адзін росчырк пяра Лукашэнкі. Але фактычна нічога не змянілася. Усё па-ранейшаму залежыць ад яго, а прымусіць яго даць адбой можа толькі салідарнасць працоўных.