Вазкі ў «Кароне» з 1 жніўня будуць выдаваць за манеты
25- 31.07.2016, 21:48
- 10,192
Каб атрымаць вазок, пакупнікам трэба будзе пакінуць у манетным прыймальніку «заклад» - 50 капеек (ці 5 тысяч рублёў у старых грошах).
Вазкі ў гіпермаркетах «Карона» з 1 жніўня будуць выдаваць за манеты. Аб'явы аб гэтым змешчаныя ў крамах сеткі. Каб атрымаць вазок, пакупнікам трэба будзе пакінуць у манетным прыймальніку «заклад» - 50 капеек (ці 5 тысяч рублёў у старых грошах).
От так вот! Я этому даже рад pic.twitter.com/GdD1wvbqFh
— @Kenny_sg (@Kenny_sg) 31 июля 2016 г.
Калі дробязі няма, трэба звярнуцца ў інфацэнтр для размену. Каб вярнуць манету, трэба будзе паставіць вазок на месца.
Такія сістэмы працуюць у шмат якіх еўрапейскіх крамах, аднак у Беларусі іх нельга было ўкараніць праз адсутнасць у абарачэнні металічных грошай.
Дарэчы, у «Кароне» аб рыхтаванай навацыі папярэджвалі яшчэ напярэдадні дэнамінацыі.
- Такі прынцып працы – агульная сусветная практыка, якая дазваляе не зарабіць, а захаваць парадак на тэрыторыі гандлёвых аб'ектаў і паркоўках, - распавядала тады Вольга Ананіч, начальніца аддзела маркетынгу, службы развіцця раздробнага гандлю ТАА «Тытунь-інвест» (сетка ГЦ «Карона» і ГЦ «Замак»).
А вось камеры захоўвання ў краме будуць працаваць паводле старых правілаў - з ключамі і без закладу.
Выдачу вазкоў за пакінутыя ў заклад капейкі планавалі выкарыстаць і іншыя гандлёвыя сеткі, адзначае tut.by.
Нагадаем, з 1 ліпеня ў «Кароне» пакінулі выдаваць дармовыя мяшкі на касах.