На модны паказ вясельных сукенак не пусцілі маму з дзіцем

Арганізатары не хацелі, каб дзіця патрапіла ў кадр.

Галоўную рэдактарку партала аб модзе, маму чацвярых дзяцей Вольгу Жадзееву не пусцілі на паказ вясельных сукенак з дачкой, якой амаль 4 гады. Тлумачылі гэта тым, што дзіця можа перашкодзіць відэаздымцы, піша «Комсомольская правда в Беларуси».

- На вячэрні паказ я прыйшла са сваім малодшым дзіцем - дачку проста не было з кім пакінуць. У мяне было два запрашальныя квіткі, таму разлічвала, што пытанняў з нагоды дзіцяці не павінна з'явіцца. Да таго ж маёй дачцэ гэта цікава, і тыя 10 хвілін, што доўжыцца паказ, яна спакойна б выседзела.

Увайсці ў залю Вользе не дазволіла кіраўніца аргкамітэту Беларускага тыдня моды Яніна Ганчарова, аргументаваўшы гэта тым, што ў іх на паказы з дзецьмі не ходзяць.

- Я здзівілася, удакладніла прычыну. Яна патлумачыла, што ідзе здымка, і дзіця можа перашкодзіць. З яе слоў, такія правілы былі заўсёды. Але я хаджу на тыдні моды з 2011 года, у тым ліку з дзецьмі - і ніколі не было такіх праблем. Мне здавалася, гэта абсалютна нармальная практыка - браць з сабой дзіцяці старэй аднаго года, калі яно не плача і не бегае. Супрацоўнікі аргкамітэта апраўдваліся потым, што проста прапанавалі мне перасесці. Хачу падкрэсліць: перасесці на ўвазе, што я ўжо сядзела. А на самай справе мне не далі нават зайсці ў залю, я была вымушаная сысці.

У прэс-службе Беларускага тыдня моды растлумачылі, што выразнай забароны на ўваход з дзецьмі ў іх няма.

- У сусветнай практыцы з дзецьмі да 12 гадоў на паказы забаронена хадзіць. Але цягам многіх гадоў наш аргкамітэт ідзе ўсім на саступкі, так як госці часта прыходзяць з дзецьмі. Для рэдактараў часопісаў у нас былі запрашальныя на адну персону - для Вольгі было зарэзервавана адно месца прама перад тэлекамерамі. Але яна прыйшла з дзіцем за пару хвілін да пачатку паказу, мы прапанавалі ёй два месцы ў першым шэрагу для яе і дзіцяці ў зоне, дзе няма камер. На наш погляд, прычыны для канфлікту не было - Вольга магла сесці на іншае месца, але яна эмацыйна адмовілася і пайшла з паказу.

Са слоў прэс-сакратара, на паказах часта прысутнічаюць госці з дзецьмі: нават на тым паказе, куды не трапіла Вольга, была жанчына з немаўлём.

- Дызайнер з Гішпаніі, Аляксандра Буднік, хацела паглядзець паказ і не імкнулася патрапіць у кадр, таму стаяла ў зоне для фатографаў. Ёсць і іншыя правілы: да прыкладу, на паказ нельга прыходзіць з сабакам. Але мы гэта не афішуем - бо і так зразумела. Калі вы ідзяце ў тэатр, вы ведаеце, што туды нельга ўваходзіць з жывёламі, марозівам або на роліках, хоць гэта не абвяшчаецца.

Арганізатары адзначаюць, што праблемы з рассаджваннем гасцей даводзіцца вырашаць кожны сезон.