У 2017 годзе ўладам давядзецца зноў прасіць $2 мільярды крэдыту

Выдаткі на абслугоўванне дзяржаўнай запазычанасці ў 2017 годзе вырастуць на 20% да 2,5 млрд рублёў.

У тым ліку абслугоўванне замежнай запазычанасці будзе каштаваць 1,7 мільярда рублёў, паведаміў намеснік міністра фінансаў Юрый Селіверстаў на пашыраным пасяджэнні пастаяннай камісіі парламента ў бюджэце і фінансах у чацвер, паведамляе tut.by.

У цэлым на выплату дзяржаўнай запазычанасці ў рэспубліканскім бюджэце прадугледжана 5,2 млрд, у тым ліку замежнай дзяржаўнай запазычанасці - 2,3 млрд рублёў, унутранай - 2,9 млрд рублёў.

На выплату дзяржаўнай запазычанасці ў замежнай валюце налета неабходна 2,3 млрд даляраў. Для гэтага плануецца прыцягнуць 1,9 мільярда даляраў, з іх 700 млн даляраў - сродкі крэдыту Еўразійскага фонду стабілізацыі і развіцця. Яшчэ 360 млн даляраў улады маюць намер атрымаць за кошт размяшчэння валютных аблігацый на ўнутраным рынку, і 800 млн даляраў - ад размяшчэння еўрабондаў.

Нагадаем, паводле стану на 1 жніўня 2016 года дзяржаўны доўг Беларусі склаў 35,9 млрд дэнамінаваных рублёў і павялічыўся з пачатку года на 9,3%, або на 3 млрд рублёў.

Пры гэтым замежная дзяржаўная запазычанасць вырасла з улікам курсавых розніц на 847 млн даляраў, або на 6,8%, да 13,3 млрд даляраў.

Унутраная дзяржаўная запазычанасць паводле стану на 1 жніўня склала 9,4 млрд рублёў, зменшылася з пачатку года на 0,4 рублёў (з улікам курсавых розніц), або на 3,8%.