Вядомы беларускі хакеіст Кальцоў скончыў жыццё самагубствам

Пра гэта паведаміла паліцыя Маямі.

Вядомы беларускі хакеіст Канстанцін Кальцоў, бойфрэнд беларускай тэнісісткі Арыны Сабаленкі, скончыў жыццё самагубствам

Пра гэта «Трибуне» паведаміла паліцыя Маямі.

«Паводле звестак следства, у панядзелак, 18 сакавіка 2024 года, прыкладна а 12.39 паліцыя і пажарныя ратавальнікі Баль-Харбара былі накіраваныя ў гатэль St. Regis Bal Harbour Resort, 9703 Collins Avenue, з нагоды мужчыны, які саскочыў з балкона. Аддзел забойстваў паліцыі акругі Маямі-Дэйд узяў на сябе расследаванне відавочнага самагубства Канстанціна Кальцова (04.17.1981). Ніякіх падазроных абставін не знойдзена», - заявіў прадстаўнік прэс-службы паліцыі.

Справай Кальцова займаецца аддзел акругі Маямі-Дэйд.

Кальцову было 42 гады. Выхаванец менскага «Юнацтва». У 1999 годзе быў абраны «Піцбургам» у першым раундзе драфта пад 18-м нумарам. Усяго ў НХЛ правёў 144 гульні, у якіх набраў 38 (12+26) балаў. Шмат гадоў выступаў на высокім узроўні ў Расеі. Ва ўфімскім «Салаваце Юлаеве» ў 2008-м стаў чэмпіёнам Расеі, а ў 2011-м - уладальнікам Кубка Гагарына. За нацыянальную каманду Беларусі згуляў на дзвюх Алімпіядах і дзявяці чэмпіянатах свету ў мацнейшым дывізіёне.

Кальцоў скончыў выступленні ў 2016-м у складзе менскага «Дынама». Затым кансультаваў будаўнічую кампанію, якая ўзводзіла дзве арэны ў комплексе «Алімпік Парк».

Трэнерскую кар'еру Канстанцін пачаў у менскім «Дынама», асістуючы Гордзі Дуаеру. Потым былі самастойная праца ў “Брэсце” і “Дынама-Маладзечне”. Пасля гэтага Кальцоў вярнуўся ў КХЛ: адзін сезон ён быў памочнікам галоўнага трэнера ў маскоўскім «Спартаку» і два ў «Салаваце Юлаеве». У сезоне-2023/24 уфімскі клуб саступіў у 1/8 фіналу плэй-оф.

18 сакавіка хакейнае агенцтва Winners у тэлеграм-канале паведаміла, што Кальцоў не падоўжыць дамову з «Салаватам Юлаевым» і працягне працу ў іншым клубе.