Беларуская скакуха атрымала польскае грамадзянства і гатовая ехаць на Алімпіяду

Пастанову аб гэтым прыняў прэзідэнт Польшчы.

Прэзідэнт Польшчы Анджэй Дуда даў польскае грамадзянства беларускай лёгкаатлетцы Марыі Жодзік. Цяпер яна зможа прадстаўляць Польшчу на Алімпійскіх гульнях у Парыжы, піша Most.

20 сакавіка Польскі саюз лёгкай атлетыкі абвясціў аб наданні беларускай спартоўцы Марыі Жодзік польскага грамадзянства. Пастанову аб гэтым прыняў прэзідэнт Польшчы Анджэй Дуда.

«Я вельмі радая, што прэзідэнт падпісаў усе дакументы і падаў мне польскае грамадзянства. Я ганаруся тым, што буду прадстаўляць Польшчу, краіну маіх продкаў. Я спадзяюся, што ўсё, што звязанае з працэдурамі World Athletics, зараз будзе гладка, і я неўзабаве буду стартаваць у футболцы з арлом на грудзях. Спадзяюся, усё пройдзе гладка і заўзятары ўбачаць мяне на Гульнях у Парыжы ў бел-чырвонай форме нацыянальнай каманды Польшчы», - сказала Жодзік.

Раней яна, выступаючы па-за конкурсам на чэмпіянаце Польшчы, устанавіла асабісты рэкорд, скокнуўшы ў вышыню на 1 м 97 см, і выканала алімпійскі нарматыў. У 2024 годзе гэта трэці вынік у свеце, паказаны ў гэтай дысцыпліне, апярэджваюць Жодзік толькі ўкраінка Яраслава Магучых з вынікам 2 м 04 см і аўстралійка Нікола Аліслейджэрс з 2 м 03 см.

Марыя Жодзік родам з Баранавічаў, але з 2022 года жыве ў польскім Беластоку. У адным з інтэрв'ю беларуска казала, што мае польскія карані. У 2020 годзе яна падпісала адкрыты ліст спартоўцаў, у якім асуджаліся факты фальсіфікацыі выбараў у Беларусі, а таксама гвалт з боку сілавікоў. Таксама спартоўка асудзіла вайну Расеі супраць Украіны.

У 2021 годзе тады яшчэ беларуская скакуха ў вышыню ўстанавіла асабісты рэкорд, узяўшы бар'ер 1 м 96 см. Гэта дало ёй права выступаць на Алімпіядзе ў Токіё ад Беларусі, аднак функцыянеры Беларускай федэрацыі лёгкай атлетыкі не забяспечылі працэдуру праходжання допінг-тэстаў у тэрміны федэрацыяй. Таму Жодзік не патрапіла на Алімпіяду ў Токіё.