Беларусь зніжае экспартныя пошліны на нафтапрадукты

У Беларусі з 1 лістапада 2012 года экспартныя пошліны на нафту і нафтапрадукты зніжаюцца да расейскага ўзроўню.

Такое рашэнне замацавана пастановай Савета міністраў рэспублікі N981 ад 26 кастрычніка 2012 года, тэкст якой апублікаваны на Нацыянальным партале прававой інфармацыі.

Так, з 1 лістапада ў Беларусі стаўка экспартнай пошліны на сырую нафту складзе $404,5 за тону (зніжэнне на 3,5%) супраць $418,9 за тону, устаноўленай з 1 кастрычніка 2012 года.

Адзіная стаўка экспартнай пошліны на светлыя і цёмныя нафтапрадукты (акрамя бензіну), якая з 1 кастрычніка 2011 года была ўніфікаваная на ўзроўні 66% ад пошліны на нафту, з 1 лістапада 2012 года складзе $267 за 1 тону супраць $276,4 у кастрычніку.

Такая ж пошліна ўстаноўлена на бензол, талуол, ксілолы.

На таварныя бензіны і прамагонны бензін стаўка вывазных мытных пошлін, зыходзячы з каэфіцыента 0,9, складзе $364,1 за 1 тону супраць $377 у кастрычніку. Разам з тым, пошліна на прапан, бутаны, этылен, прапілен, бутылен і бутадыен, іншыя звадкаваныя газы вырасце з $172,5, да $192,4.

Як раней паведамлялася, Расея, згодна з пастановай урада, з 1 лістапада 2012 года ажыццяўляе паніжэнне ставак экспартных пошлін на сырую нафту і нафтапрадукты.

Беларусь з 2010 года поўнасцю ўніфікавала стаўкі экспартных мытных пошлін на нафту і нафтапрадукты да расейскага ўзроўню.

Акрамя таго, рэспубліка, у адпаведнасці з міжурадавым пагадненнем ад 9 снежня 2010 года, якое рэгулюе механізм размеркавання экспартных пошлін на нафту і нафтапрадукты, пералічвае ў бюджэт РФ увесь аб'ём экспартных пошлін на нафтапрадукты, атрыманыя з расейскай нафты. Экспартныя пошліны на нафтапрадукты, выпрацаваныя з нафты, якая прыходзіць з трэціх краін, паступаюць у беларускі бюджэт. Таксама, згодна з дакументам, з 1 студзеня 2011 года Расея пастаўляе ў Беларусь бяспошлінна ўвесь аб'ём нафты.

За студзень-верасень 2012 года Беларусь пералічыла ў бюджэт Расеі $2,93 млрд пошлін ад экспарту нафтапрадуктаў, атрыманых з расейскай нафты. У 2011 годзе ў бюджэт РФ было пералічана $3,07 млрд экспартных пошлін.

Раней таксама паведамлялася, што ўрад РФ зацвердзіў новую схему разліку экспартных пошлін на нафтапрадукты, якая дзейнічае з 1 кастрычніка 2011 года. У адпаведнасці з ёй лімітавы каэфіцыент пры разліку ставак пошлін на нафту зніжаны 65% да 60%. Згодна з гэтай схемай, экспартная пошліна на цёмныя нафтапрадукты павялічана з 47% да 66% ад пошліны на нафту.

Пошліна на дызельнае паліва засталася на ўзроўні 66% ад пошліны на нафту, а пошліна на ўсе віды бензінаў складае 90% ад пошліны на нафту.