Частату «Аўтарадыё» аддаюць «Сталіцы»

«Дзяржава ператвараецца ў злодзея», - кажа дырэктар «Аўтарадыё» Юрый Базан.

Беларускі радыётэлевізійны цэнтр перадачы паведаміў аб тым, што прыём гукавой эфірнай праграмы «Сталіца» будзе ажыццяўляцца на частаце 105,1 МГц, на якой працавала закрытае «Аўтарадыё».

Гэта ж пацвердзіў і дырэктар радыё «Сталіца» Алег Міхалевіч. Але сказаў, што пераход з УКХ ў ФМ дыяпазон адбудзецца недзе ў красавіку, піша «Наша Ніва».

Дырэктар «Аўтарадыё» Юрый Базан адзначыў, што зараз іхнія дакументы на вылучэнне частаты знаходзяцца ў Міністэрстве сувязі і інфарматызацыі, куды іх перадалі з Мінінфармацыі. Нягледзячы на ​​тое, што «Аўтарадыё» праплаціла за частату да 31 сакавіка 2012 года.

Юрый Базан пакуль не атрымаў ніякіх афіцыйных адмоваў.

І не разумее, як «Сталіцы» перадалі частату 105,1 Мгц. Па ягоных словах, Міністэрства інфармацыі павіннае праводзіць адкрыты конкурс. Але Базан не чуў, каб ён адбыўся. Хіба толькі «па-ціхаму». «Дзяржава ператвараецца ў злодзея», - адзначыў ён.

Нагадаем, 12 студзеня 2011 года рэдакцыя «Аўтарадыё» атрымала прадпісанне Мінсувязі аб спыненні дазволу на права выкарыстання частот. Загад аб спыненні вяшчання «Аўтарадыё» быў вынесены на падставе рашэння Рэспубліканскай камісіі па тэлебачанні і радыёвяшчанні. На ім стаяў подпіс старшыні камісіі Алега Праляскоўскага.

Афіцыйнай прычынай пазбаўлення радыёстанцыі частот стала «невыкананне творчай канцэпцыі і распаўсюд інфармацыі, якая змяшчае публічныя заклікі да экстрэмісцкай дзейнасці».

Падчас выбарчай кампаніі «Аўтарадыё» пускала ў эфір ролікі кандыдатаў у прэзідэнты Саннікава і Някляева, дзе тыя заклікалі прыходзіць «на плошчу».

З 1999 года «Аўтарадыё» працавала на частаце 67,7 МГц. З 2001 года да яе дадалася яшчэ адна частата - 105,1 МГц.