Toyota запусціць трохколавы электрамабіль (Відэа)

Японскі аўтаканцэрн Toyota пацвердзіў падрыхтоўку да запуску вытворчасці трохколавага аўтамабіля Toyota i-Road.

Пры гэтым Toyota адмовілася ад канцэпцыі двухмеснага трохколавіка на карысць маленькай яго мадэлі, піша «Інтэрфакс».

Абмежаваная серыя электрычнага трохколавага аўтамабіля Toyota i-Road запушчаная ў вытворчасць у Японіі, поўнамаштабны серыйны выпуск пачнецца з 2014 года. Аднак Toyota пакуль не мае намеру выпускаць электрамабіль у вольны продаж: першыя i-Road прызначаныя для эксперыменту па рэарганізацыі гарадскога руху ў Японіі.

На вуліцах Токіо з'явіцца сістэма сумеснага карыстання электрамабілямі пад назвай Ha:Mo. У рамках эксперыменту Toyota арганізуе на вуліцах японскай сталіцы больш за 20 станцый, дзе можна будзе ўзяць электрамабіль напракат для кароткачасовых асабістых паездак. Адзіная сістэма навігацыі зможа падказаць кіроўцу аптымальны маршрут паездкі, каб пазбегнуць затораў, а таксама зэканоміць час і электраэнергію.

Адпраўляць заяўку на арэнду i-Road можна будзе пры дапамозе мабільных прылад.

Toyota зрабіла i-Road невялікім гарадскім аўтамабілем, сцвярджаючы, што новая канцэпцыя дазваляе аб'яднаць зручнасць матацыкла з надзейнасцю аўтамабіля і дапоўніць іх задавальненнем ад кіравання арыгінальным транспартным сродкам. Даўжыня канцэпт-кара, які быў разлічаны на дваіх, складала 2350 мм, шырыня - 850 мм, вышыня - 1445 мм. Электрамабіль важыць усяго 300 кг.

Toyota i-Road можа разганяцца да 45 км у гадзіну. Зарада акумулятара трохколавіка хапае амаль на 50 км шляху. Машына сілкуецца ад двух электрарухавікоў - па адным на два пярэдніх колы. Пры павароце электрамабіль аўтаматычна нахіляецца на патрэбны вугал у залежнасці ад хуткасці і паверхні дарогі.