Прафсаюзны лідар Мазырскага НПЗ аб'яўляе галадоўку

Старшыня першаснай арганізацыі Беларускага незалежнага прафсаюза (БНП) на ААТ «Мазырскі НПЗ» Юрый Швец мае намер 14 кастрычніка абвясціць галадоўку.

Так актывіст адважыўся пратэставаць супраць беззаконня, якое чыніліся адміністрацыяй прадпрыемства ў дачыненні да чальцоў незалежнага прафсаюза.

Паводле сведчання Юрыя Швеца, з 2008 года да гэтага часу з боку кіраўнікоў Мазырскага НПЗ у дачыненні да незалежнага прафсаюза і яго чальцоў здзяйсняецца бесперапынны ціск, пераслед, дыскрымінацыя, парушэнні іх канстытуцыйных, працоўных і грамадзянскіх правоў.

Апошняй кропляй, якая перапоўніла чашу цярпення, для Юрыя Швеца паслужыла звальненне адразу пецярых сяброў незалежнага прафсаюза - работнікаў праектна-канструктарскага аддзела мужа і жонкі Генадзя і Таццяны Баброўнікаў, а таксама работнікаў цэха №12 Уладзіміра Ключнікава, Аляксея Ермака і Івана Шабана. На гэтых работнiкаў паводле наўмысна сфабрыкаваных, даведзеных да абсурду абвінавачванняў былі накладзеныя шматлікія спагнанні, якія з'явіліся падставай для таго, каб не працягваць з імі тэрміновыя працоўныя кантракты.

Лідар прафсаюза ўпэўнены, што дысцыплінарныя спагнанні, накладзеныя на гэтых работнікаў, ніякім чынам не адпавядаюць цяжару дапушчаных імі парушэнняў, а таксама супярэчаць нормам Працоўнага Кодэкса РБ. Звароты незалежнага прафсаюза ў адміністрацыю прадпрыемства, пракуратуру і суд для таго, каб абараніць сваіх чальцоў, у гэтым, як і ў многіх іншых выпадках, ні да чаго не прывялі.

Генеральны дырэктар ААТ «Мазырскі НПЗ» Анатоль Купрыянаў не жадае сустракацца з Юрыем Швецам і Радай прадстаўнікоў першаснай арганізацыі незалежнага прафсаюзу для абмеркавання сітуацыі, якая склалася. Анатоль Купрыянаў таксама адмовіўся ад сустрэчы са старшынём БНП Мікалаем Зіміным і лідарам БКДП Аляксандрам Ярашуком.

У гэтай сітуацыі Юрый Швец адважыўся на адчайны крок - 14 кастрычніка ён мае намер пачаць трохдзённую галадоўку. У выпадку, калі яго патрабаванні не будуць выкананыя, ён гатовы аб'явіць бестэрміновую галадоўку.

- У мяне няма іншага выйсця, бо гаворка ідзе пра лёсы людзей. Я патрабую спыніць супрацьзаконныя дзеянні ў дачыненні да сябраў незалежнага прафсаюзу Мазырскага НПЗ. Настойваю на правядзенні поўнага і аб'ектыўнага расследавання абставінаў звальнення Генадзя і Таццяны Баброўнікаў, Уладзіміра Ключнікава, Аляксея Ермака і Івана Шабана з прыцягненнем кампетэнтных незалежных спецыялістаў. Патрабую адмены вынесеных ім дысцыплінарных спагнанняў і падаўжэння працоўных адносін на ўмовах, прадугледжаных заканадаўствам краіны і лакальнымі прававымі актамі, якія дзейнічаюць на прадпрыемстве, - кажа Юрый Швец.