Справа «Экамедсэрвіса»: абвінавачванні прад'яўленыя тром супрацоўнікам

За смерць пацыенткі «Экамедсэрвіса» адкажуць анестэзіёлаг, галоўны інжынер і гендырэктар.

«Следчым камітэтам завершаныя следчыя дзеянні па крымінальнай справе ў дачыненні да службовых асоб СТАА «Экамедсэрвіс - Медыцынскі цэнтр». Канчатковыя абвінавачванні ў здзяйсненні злачынства прад'яўленыя генеральнаму дырэктару цэнтра, лекару анестэзіёлагу-рэаніматолагу (кіраўніку групы анестэзіялогіі і рэанімацыі СТАА «Экамедсэрвіс - Медыцынскі цэнтр»), галоўнаму інжынеру інжынерна-эксплуатацыйнага аддзела», - паведамілі агенцтву «Інтэрфакс-Захад» у аддзеле інфармацыі і сувязі з грамадскасцю Следчага камітэта Беларусі.

Паводле інфармацыі СК, дзеянні лекара анестэзіёлага-рэаніматолага кваліфікаваныя па ч. 2 арт. 162 (неналежнае выкананне прафесійных абавязкаў медыцынскім работнікам, што пацягнула па неасцярожнасці смерць пацыента), дзеянні двух іншых абвінавачаных - па арт. 428 (службовая халатнасць, якая пацягнула па неасцярожнасці смерць чалавека) Крымінальнага кодэкса Беларусі.

Як праінфармавалі ў СК, устаноўлена, што ў ходзе правядзення аперацыі пацыенту, была выкарыстаная няспраўная анестэзіялагічная апаратура для штучнай вентыляцыі лёгкіх кіслародна-паветранай сумессю.

«Паводле атрыманых следствам звестак, прычынай смерці пацыента Юліі Кубаравай з'явілася змярцвенне кары і шырокіх участкаў падкоркавых аддзелаў вялікіх паўшар'яў галаўнога мозгу з прычыны кіслароднага галадання галаўнога мозгу, якое развілося пры правядзенні агульнай анестэзіі падчас аператыўнага ўмяшання і пасляаперацыйнага перыяду, якое ўскладнілася шэрагам працэсаў, у выніку чаго наступіла паліорганная недастатковасць, якая з'явілася непасрэднай прычынай смерці пацыента», - адзначылі ў аддзеле інфармацыі і сувязі з грамадскасцю СК.

Там падкрэслілі, што следчай групай выкананы значны аб'ём следчай працы. «Да расследавання прыцягваліся кампетэнтныя спецыялісты Дзяржаўнага камітэта судовых экспертыз Беларусі. Грунтоўна вывучана і далучана да матэрыялаў справы інфармацыя аб асобах абвінавачаных», - дадалі ў СК.

Паводле інфармацыі СК, у цяперашні час рыхтуецца матываванае прадстаўленне аб ліквідацыі прычын і ўмоў, якія садзейнічалі здзяйсненню дадзенага злачынства. «Удзельнікі крымінальнага працэсу прыступаюць да азнаямлення з матэрыяламі крымінальнай справы», - дадалі там.

Нагадаем, у межах крымінальнай справы, узбуджанай у сувязі са смерцю пацыенткі медыцынскага цэнтра «Экамедсэрвіс» Юліі Кубаравай, у траўні бягучага года былі затрыманыя 6 чалавек, трое з якіх былі пасля арыштаваныя. У ходзе расследавання справы да 4-х супрацоўнікаў медцэнтра - лекара-хірурга, двух медсясцёр, а таксама галоўнага інжынера - была прымененая мера стрымання, не звязаная з пазбаўленнем волі.

Пасля пластычнай аперацыі па карэкцыі формы носа ў сталічным камерцыйным медцэнтры «Экамедсэрвіс» 27 сакавіка Кубарава не прыйшла ў прытомнасць. Праз чатыры тыдні пацыентка, перанакіраваная ў 4-ю гарадскую клінічную бальніцу, памерла.