У электрычцы Маладзечна-Менск памёр мужчына
8- 15.03.2013, 12:15
Сёння, 15 сакавіка, электрацягнік Маладзечна - Менск адпраўленнем у 8.34 не сышоў на Менск своечасова з-за таго, што ў вагоне электрычкі памёр мужчына.
Адпраўленне было затрымана прыкладна на гадзіну. Такі час спатрэбіўся супрацоўнікам Маладзечанскага раённага аддзела Следчага камітэта Рэспублікі Беларусь для таго, каб правесці следчыя дзеянні і ўстанавіць: смерць не была гвалтоўнай.
Пра гэта распавёў kraj.by начальнік Маладзечанскага аддзялення ўнутраных спраў на транспарце Міхаіл Гуд. Паводле яго слоў, ніякага крыміналу ў гэтай гісторыі няма. Электрычка прыйшла з Менска. Труп знайшлі, калі яна рыхтавалася да адпраўлення назад у сталіцу.
Па вакзале абвясцілі, што электрацягнік затрымліваецца. Пасажыры, якія набылі квіткі, змаглі з'ехаць на дызельным цягніку Гудагай - Менск, які праходзіў праз Маладзечна ў 9.14.