Bloomberg: ЗША пара заняцца дэспатам Лукашэнкам
51- 6.03.2013, 8:56
ЗША неабходна выкарыстоўваць Міжнародны крымінальны суд для барацьбы з дыктатарамі.
Пра гэта піша незалежны міжнародны адвакат па правах чалавека Эндру Фрыдман на сайце найбуйнейшага фінансавага інфармацыйнага агенцтва свету Bloomberg (пераклад - charter97.org).
У якасці прыкладу ён прыводзіць лукашэнкаўскую Беларусь.
«Для любога сходу патрабуецца абавязковы дазвол ад уладаў, у якім звычайна адмаўляюць. Людзей, якія асмельваюцца выходзіць на недазволеныя мітынгі і дэманстрацыі, збіваюць і арыштоўваюць. Нават за ўдзел у бяскрыўдных мерапрыемствах, накшталт шпацыраў з хлопаннем у ладкі, пагражае турэмны тэрмін.
Беларускія «выбары» ўяўляюць сабой яшчэ больш гаротны прыклад. Пасля прэзідэнцкай кампаніі 2010 года 7 з 9 кандыдатаў апынуліся за кратамі. Некаторыя атрымалі працяглыя тэрміны зняволення. Апазіцыйнага кандыдата Андрэя Саннікава абвінавацілі ў «парушэнні грамадскага парадку» за яго ўдзел у арганізацыі пратэстаў. Прасцей кажучы, у Беларусі толькі прыхільнікі рэжыму могуць выходзіць на вуліцы ці ўдзельнічаць у выбарах. Апаненты Лукашэнкі могуць ісці толькі ў турму», - піша аўтар артыкула пра нашу краіну.
Гэтак жа ён характарызуе і Венесуэлу. Яе, як і Беларусь, у Еўропе і ЗША адкрыта абвінавачваюць у дыктатуры і лічаць прыкладам сілавога падаўлення апазіцыі і прыгнёту нязгодных з уладай.
На думку Эндру Фрыдмана, ЗША і ААН пара ўмяшацца і прымусіць дэспатычных кіраўнікоў гэтых дзяржаў выконваць міжнароднае права. І для гэтага ён прапануе здзейсніць некалькі крокаў.
У першую чаргу, на думку аўтара артыкула, Амерыцы варта перагледзець сваё ўласнае стаўленне да міжнароднага права і ратыфікаваць Канвенцыю ААН па марскім праве і аднавіць перамовы аб удзеле краіны ў Міжнародным крымінальным судзе.
ААН Фрыдман прапануе звярнуць увагу на ўдзел аўтарытарных рэжымаў у Радзе па правах чалавека. «Толькі калі лідэрства будзе ў руках ЗША і ААН, з'явіцца шанец, што дэспатычныя ўрады стануць паважаць міжнароднае права», - перакананы аўтар артыкула.