Варламаву ў суд выклікалі «хуткую»

Мадэльеру Сашы Варламаву, працэс над якім праходзіць у Ленінскім судзе Менска, 4 красавіка выклікалі хуткую дапамогу.

8 красавіка разгляд справы працягнецца. Мадэльера абвінавачваюць у прысваенні грошай і ў тым, што ён не плаціў падаткі.

Пра гэта «Радыё Свабода» распавяла яго сястра Рыма.

«Яму стала дрэнна і сюды ў суд 4 красавіка выклікалі хуткую дапамогу, пасля чаго працэс быў адкладзены. А 5 красавіка ён працягваўся, але вельмі коратка. Паказанні даюць і сведкі, і пацярпелыя. Ён разнерваваўся. Людзі казалі, што іх прымушалі даваць паказанні і пагражалі тэрмінам. Лекары аказалі яму дапамогу і пасля абеду пасяджэння не было. А на наступны дзень было толькі раніцай. Магчыма, што з-за стану здароўя, пра гэта ж ніхто не гаворыць», - распавяла Рыма.

Яна сказала, што пра стан здароўя Сашы Варламава «пакуль нічога невядома»:

«Адказу нам ніхто не дае. Нам ніхто нічога не кажа».

Раней Варламаў заявіў, што ў суд былі пададзеныя недакладныя звесткі вынікаў магнітна-рэзананснай тамаграфіі. На самай справе ў яго заблакавана 4 пазванка, яму цяжка дыхаць. Але, нягледзячы на дрэнны стан здароўя, ён сказаў, што збіраецца трываць і ўдзельнічаць у працэсе і надалей.

Нагадаем, дырэктар ПУП «Агенцтва моды Сашы Варламава», былы мастацкі кіраўнік Цэнтра сучаснага стылю і моды «UNIVERSUM MODELS» упраўлення па справах культуры БДУ, былы намеснік старшыні арганізацыйнага камітэта рэспубліканскага фестывалю-конкурсу моды і фота «Млын моды» і начальнік Цэнтра маладзёжнай моды БДУ Варламаў быў заключаны пад варту 20 траўня 2011 года.

Варламаву было прад'яўленае канчатковае абвінавачанне ў здзяйсненні злачынстваў, якія прадугледжваюць адказнасць за здзяйсненне махлярства ў асабліва буйным памеры (ч.4 арт.209 КК), крадзеж шляхам злоўжывання службовымі паўнамоцтвамі ў буйным памеры (ч.3 арт.210), прысваенне маёмасці (ч. 2 арт.211), ухіленне ад выплаты падаткаў (ч.1 арт.243), злоўжыванне службовымі паўнамоцтвамі (ч.3 арт. 424).

У якасці сведак па крымінальнай справе дапытана больш за 800 чалавек, пацярпелымі прызнаныя 353 асобы.

Па дадзеных следства, агульная матэрыяльная шкода, прычыненая злачыннымі дзеяннямі Варламава, склала больш за Br1,2 млрд.