У Швецыі разгарэўся чарговы скандал з TeliaSonera

Праваабаронцы абураныя, што спонсарам конкурсу «Еўрабачанне-2013» выступіла кампанія, якая супрацоўнічала з беларускім рэжымам.

Падрыхтоўка да суботняга фіналу песеннага конкурсу Еўрабачанне-2013 у шведскім Мальме ў разгары. Між тым, праваабаронцы абураныя, што на конкурсе галоўным спонсарам выступае тэлекамунікацыйная кампанія TeliaSonora з «падмочанай» рэпутацыяй. Яе абвінавачваюць у прадастаўленні неабмежаванага доступу ўрадам постсавецкіх краін да прыватных тэлефонаў і электроннай пошты грамадзян, піша сайт evrofor.ru.

Калі шведская спявачка Ларын выйграла песеннае спаборніцтва «Еўрабачанне» ў мінулым годзе ў Баку, яна выступіла як абаронца правоў чалавека на постсавецкай прасторы. Яе абурылі парушэнні правоў чалавека ў Азербайджане, дзе, па яе словах, «штодзень парушаюць правы чалавека». Ларын раскрытыкавала беларускага кіраўніка Аляксандра Лукашэнку, які пераследуе грамадзянскіх актывістаў і ўпякае іх у турмы, як, напрыклад, Алеся Бяляцкага.

«Гэта боль майго сэрца, такая выдатная сям'я разбітая, калі сын у адным месцы, іншы ў другім, бацька ў турме і яны ж змагаюцца за справядлівасць», - заявіла Ларын.

Былі надзеі, што новая гаспадыня «Еўрабачання-2013» лібэральная Швецыя, пакажа сваю гасціннасць на 58-м песенным конкурсе на фоне абароны правоў чалавека. Але, як адзначаюць праваабаронцы, гэтага не адбылося. Гаворка ідзе пра галоўнага спонсара сёлетняга «Еўрабачання» ў шведскім Мальме, тэлекамунікацыйнага гіганта TeliaSonera.

Цяпер праводзіцца расследаванне дзейнасці гэтай кампаніі. Яе абвінавачваюць у тым, што яна давала шматмільённыя хабары ўзбекскаму рэжыму Карымава ў абмен на доступ да масавага тэлефоннага рынку Узбекістана. А таксама ў прадастаўленні неабмежаванага доступу ўрадам Азербайджана, Беларусі, Грузіі, Казахстана, Таджыкістана і Узбекістана да прыватных тэлефонаў і інтэрнэт-пошты, якія выкарыстоўваюцца гэтымі ўрадамі для пераследу сваіх палітычных праціўнікаў.

Еўрапейскі радыёвяшчальны саюз таксама спрыяе TeliaSonera

Джаахім Дзіфвермак, журналіст, які займаецца расследаваннямі і мае сваю тэлепраграму Uppdrag Granskning на шведскім тэлеканале SVT, кажа, што гэтая кампанія, якая пераважна спансуецца ўрадамі Швецыі і Фінляндыі, загразла ў сумніўных здзелках з мэтай выхаду на постсавецкія рынкі.

«Яны падвяргаліся рызыцы, ведаючы пра ўдзел рэжымаў у злачынствах супраць правоў чалавека, ведаючы пра кошт, які яны павінны заплаціць ва Узбекістане, дзе яны давалі хабары рэжыму, - адзначае Джаахім Дзіфвермак. - Яны атрымалі ліцэнзіі дзякуючы дамове з рэжымам, даючы іх спецслужбам доступ да прыватнай інфармацыі кліентаў. Яны загразлі ў балоце змоў з гэтымі дыктатурамі».

Па словах гледачоў, КДБ Беларусі таксама атрымаў неабмежаваны доступ да прыватнай мабільнай сувязі, дзякуючы мясцоваму аддзяленню TeliaSonera.

Еўрапейскі радыёвяшчальны саюз (EBU), які і кантралюе песенныя конкурсы Еўрабачання, падаў TeliaSonora галоўны кантракт конкурсу ў 2013 годзе. Ён таксама даў права TeliaSonera субсідаваць і леташні конкурс у Баку.

Між тым прэс-сакратар Еўрапейскага радыёвяшчальнага саюза Аніка Ніберг адзначае, што «мы не арганізацыя па абароне правоў чалавека, мы - СМІ». Яна перакананая, што TeliaSonera адкажа на ўсе абвінавачванні.

Між тым грамадскасць і праваабаронцы абураныя, што такая кампанія, як TeliaSonera атрымала магчымасць быць спонсарам «Еўрабачання».