Сярэдняя стаўка тэрміновых дэпазітаў апусцілася да 30,9%

Банкі Беларусі спрабуюць знізіць стаўкі тэрміновых дэпазітаў.

Дынаміку ставак крэдытна-дэпазітнага рынку публікуе Нацбанк Беларусі.

Так, у красавіку сярэдняя стаўка дэпазітаў для фізічных асоб на тэрмін да 1 года апусцілася з 36,9% да 30,9%, а для дэпазітаў на тэрмін больш за 1 года - з 38,8% да 34,8%.

Пры гэтым дэпазітныя стаўкі ў замежнай валюце практычна не змяніліся: у красавіку сярэдняя стаўка дэпазітаў для фізічных асоб на тэрмін да 1 года вырасла з 4,5% да 4,6%, для дэпазітаў на тэрмін больш за 1 года апусцілася з 5,9 % да 5,8%.

Нагадаем, тэрміновыя дэпазіты ў беларускіх рублях праз фантастычныя працэнтныя стаўкі дасягнулі дадэвальвацыйнагаа ўзроўню сакавіка 2011 года і склалі на 1 траўня 38,7 трлн беларускіх рублёў, або больш за 4,5 млрд даляраў, з іх 2,6 млрд даляраў на рахунках фізічных асоб.

Курс даляра з 1 студзеня 2012 года вырас усяго на 1% і прыбытковасць укладаў у беларускіх рублях у разы вышэйшая прыбытковасці ўкладаў у СКВ. На думку экспэртаў, такая сітуацыя больш нагадвае фінансавую піраміду.