Украіна абмежавала свабоду сходаў і ўвяла цэнзуру ў інтэрнэце

Адпаведныя законы сёння ў экстранным парадку прыняла Вярхоўная Рада.

За прыняцце зменаў прагаласавала 239 дэпутатаў, піша ain.ua.

Аўтарства належыць дэпутатам Вадзіму Калеснічэнку і Уладзіміру Алійніку («Партыя рэгіёнаў»). У тлумачальнай запісцы прама гаворыцца, што напісанне закона звязана з пратэстнымі акцыямі ва Украіне, і, у прыватнасці - з роляй сацыяльных сетак у развіцці падзей. Паколькі, на думку аўтараў закона, сацыяльныя сеткі ўсё часцей выкарыстоўваюцца для распальвання варожасці на палітычнай, моўнай і іншых падставах.

Закон утрымлівае норму, якая дадае папраўку ў Крымінальны кодэкс Украіны, арт. 109, 110, 151. У прыватнасці, гаворка ідзе пра тое, што захоўванне або распаўсюд экстрэмісцкіх матэрыялаў, у тым ліку, «праз СМІ, сетку інтэрнэт, сацыяльныя сеткі» вядуць да штрафу ад 600 да 800 мінімумаў даходаў грамадзян, якія не абкладаюцца падаткам, з канфіскацыяй экстрэмісцкіх матэрыялаў (17 грн, то бок, гаворка ідзе пра штрафы ў памеры прыкладна 10-13 000 грн). Тое ж парушэнне, здзейсненае паўторна, можа прывесці да штрафу ў 1000-3000 мінімумаў альбо ж да абмежавання/пазбаўлення волі на тэрмін да трох гадоў.

Пад экстрэмісцкімі матэрыяламі маюцца на ўвазе прызначаныя да абнародавання любыя дакументы (у тым ліку, у электроннай форме), якія заклікаюць да гвалтоўнай змены або звяржэння канстытуцыйнага ладу, гвалтоўнага захопу ўлады, умяшанню ў працу дзяржаўных органаў і г.д.

Яшчэ адной навінкай закона з'яўляецца пашырэнне паўнамоцтваў Нацыянальнай камісіі па сувязі (НКРСІ). Прапануецца ўнесці змены ў закон аб тэлекамунікацыях (арт. 18 аб паўнамоцтвах НКРСІ), паводле якіх камісія зможа прымаць пастановы «ў абмежаванні доступу абанентаў аператараў тэлекамунікацый да рэсурсаў сеткі інтэрнэт, праз якія здзяйсняецца распаўсюд інфармацыі, што супярэчыць закону». Пастанова аб блакаванні прымаецца на падставе экспертнай высновы.

Таксама НКРСІ зможа забараняць дзейнасць інфармагенцтваў без пасведчання, г.зн. фактычна любога сайта, на якім публікуюцца матэрыялы навін «з мэтай прадстаўлення інфармацыйных паслуг». Праўда, гэта не тычыцца сайтаў кампаній або дзяржорганаў. Пастанову камісіі можна аспрэчваць у судзе. Паводле закона, асобы, якія ажыццяўляюць дзейнасць інфармагенцтваў без пасведчання аб рэгістрацыі, атрымаюць тры месяцы на тое, каб атрымаць такое пасведчанне або спыніць сваю дзейнасць. Паводле дзейнага закону аб інфармагенцтвах, такімі з'яўляюцца суб'екты інфармацыйнай дзейнасці, зарэгістраваныя як юрыдычныя асобы, якія дзейнічаюць з мэтай прадстаўлення інфармацыйных паслуг.

Таксама, мяркуецца, што аператары сувязі павінны будуць прадстаўляць абанентам паслугі на падставе дамовы. Іншымі словамі, для набыцця SIM-карты абаненту цяпер абавязкова спатрэбіцца засведчыць сваю асобу.

Таксама, у Крымінальным кодэксе прапануецца прадугледзець пакаранне за паклёп (арт. 151), у тым ліку - праз публічныя матэрыялы ў інтэрнэце (санкцыя - ад 50 да 300 мінімумаў даходаў, якія не абкладаюцца падаткамі, або папраўчыя работы да года).

Закон уступіць у дзеянне на наступны дзень пасля таго, як будзе падпісаны прэзідэнтам і апублікаваны ў дзяржаўных друкаваных выданнях.