МЗС Літвы: ЕЗ увядзе санкцыі супраць украінскіх уладаў

Давер ЕЗ да ўкраінскіх уладаў упаў.

Міністр замежных спраў Літвы Лінас Лінкявічус мяркуе, што па стане на сёння меры Еўрапейскага Звязу ў дачыненні да Украіны ў сувязі з абвастрэннем палітычнага крызісу з'яўляюцца недастатковымі і не выключае, што ў выпадку пагаршэння сітуацыі Брусэль увядзе санкцыі, піша gazeta.ua.

Кіраўнік знешнепалітычнага ведамства Літвы канстатаваў, што адносіны паміж Кіевам і Брусэлем ужо не такія, як раней. «Прыйшоў час, калі нашы адносіны не могуць заставацца ранейшымі. Давер упаў, ёсць сур'ёзнае расчараванне невыкананнем абавязацельстваў», - растлумачыў ён.

Высокапастаўлены дыпламат таксама крытычна выказаўся ў дачыненні да пазіцыі, якую ў гэты час заняў Брусэль у дачыненні да Кіева. «З майго пункту гледжання, нашы меры не з'яўляюцца эфектыўнымі, мы маглі б зрабіць больш. Часам слоў не хапае, і патрэбныя дзеянні. Я не буду падаваць драбніцы. Але я не магу абыякава глядзець на людзей, якія стаяць на марозе два месяцы са сцягамі ЕЗ і з надзеяй на будучыню. Трэба дапамагчы. Патрэбныя больш канкрэтныя меры, і я думаю, што мы да гэтага прыйдзем, калі не ўбачым паляпшэння сітуацыі», - упэўнены суразмоўца.

Пры гэтым ён станоўча адказаў на пытанне, што пад «больш канкрэтнымі мерамі» гаворка ідзе пра санкцыі. «Калі супраць мірных дэманстрантаў будзе ўжытая сіла, будуць наступствы. Я б не выключыў, што ў такім выпадку будзе абмяркоўвацца пытанне аб санкцыях. Цяпер гэтага няма, але я б не выключыў гэтага ў будучыні», - мяркуе Лінкявічус.

Нагадаем, прыняцце Вярхоўнай Радай законаў, якія ўжо былі названыя грамадскасцю «дыктатарскімі», выклікала новую хвалю пратэстаў ва Украіне. Пасля дзевятага Народнага веча, якое прайшло 19 студзеня ў Кіеве, мітынгоўцы, сярод якіх былі і радыкальна настроеныя актывісты, пайшлі пікетаваць Вярхоўную Раду, але напароліся на мяжу сілавікоў ля стадыёна імя Лабаноўскага. Пачаліся сутыкненні радыкалаў з сілавікамі. Актывісты сталі падпальваць міліцэйскія аўтамабілі. Тыя ў сваю чаргу ўжылі вадамёты і гумовыя кулі. З абодвух бакоў - дзясяткі параненых. ЗША і ЕЗ заклікалі пачаць перамовы з усімі бакамі, каб развязаць праблему палітычнага супрацьстаяння, разгледзець патрабаванні пратэстуючых і прадухіліць эскалацыю гвалту. Прэзідэнт Віктар Януковіч зноў прапанаваў правесці «круглы стол» з удзелам апазіцыі.