За пахаваннем беларускага героя Майдана сачылі невядомыя на «Жыгулях»
18- 29.01.2014, 15:36
- 4,018
Невядомыя людзі ў цывільным сачылі за пахаваннем забітага ў Кіеве Міхаіла Жызнеўскага.
Пад Гомелем, на могілках вёскі Знамя Працы, учора пахавалі Міхаіла Жызнеўскага, забітага 22 студзеня на Майдане. Пахаваць маладога чалавека планавалі ў 12 гадзін, але толькі ў 19 гадзін вечара машына з яго целам змагла прайсці беларускую мяжу.
На пахаванне сабраліся родныя Міхаіла Жызнеўскага, грамадскія актывісты з Гомеля і Менска, журналісты - усяго каля 40 чалавек, перадае «Белсат».
Хаваць Міхаіла Жызнеўскага прыйшлося ўжо пасля заходу сонца. Магілу асвятлялі толькі пражэктары відэааператараў і фары аўтамабіляў.
На зваротным шляху некаторыя з аўтамабіляў, якія ехалі з пахавання, спыняў супрацоўнік ДАІ і правяраў дакументы, маўляў, звычайная праверка на дарозе. Побач з даішнікамі стаялі некалькі чалавек у цывільным.
Яшчэ перад тым, як прывезлі Міхаіла Жызнеўскага, да могілак пад'ехалі невядомыя «Жыгулі» і спыніліся непадалёк. Актывісты вырашылі пацікавіцца, хто прыехаў і не вырашаецца выйсці з машыны. Але аўто ад'ехала, калі актывісты пачалі да яго падыходзіць. Пасля пахавання гэтыя самыя «Жыгулі» стаялі на выездзе з вёскі.
Міхаіл Жызнеўскі, якому 26 студзеня споўнілася б 26 гадоў, быў забіты стрэлам у сэрца 22 студзеня падчас беспарадкаў на вуліцы Грушэўскага ў Кіеве.
Фота: «Белсат»