Акцёр Аляксей Дзявотчанка знойдзены мёртвым у Маскве

Вядомы акцёр, вядомы сваімі апазіцыйнымі поглядамі на палітыку расейскіх улад, знойдзены мёртвым у лужыне ўласнай крыві.

Паліцыя праводзіць расследаванне абставін смерці артыста. Крыніца ў праваахоўных органах не выключае крымінальны характар смерці, паведамляе ТАСС.

Як паведамляе партал LifeNews, цела Аляксея Дзявотчанкі выявілі ягоныя родныя каля ўваходных дзвярэй. Ён ляжаў там у лужыне ўласнай крыві. Пакуль падрабязнасці справы не паведамляюцца. Вядома толькі, што супрацоўнікі праваахоўных органаў устанаўліваюць абставіны гібелі вядомага акцёра тэатра і кіно.

Cмерць акцёра можа насіць крымінальны характар. Пра гэта заявіў крыніца ў праваахоўных органах, каментуючы інфармацыю аб выяўленні цела Дзявотчанкі. Ён таксама пацвердзіў, што акцёра знайшлі на адрасе Алтуф’еўская шаша, дом 100.

Афіцыйна ў ГУ МУС пацвярджаюць толькі выяўленне на гэтым адрасе цела мужчыны 1965 нараджэння, аднак імя загінулага не называюць.

Дзявотчанку нядаўна споўнілася 49 гадоў. З 2012 года ён выступаў на сцэне МХТ ім. Чэхава, а да гэтага працаваў у тэатрах Санкт-Пецярбурга. Шырокі глядач ведае яго праз ролі ў серыялах "Бандыцкі Пецярбург", "Бандыцкі Пецярбург 2" і "Забойная сіла", піша "Маскоўскі камсамолец".

Але таксама Дзявотчанка быў вядомы сваёй грамадскай дзейнасцю. Ён уваходзіў у аб'яднаны грамадзянскі фронт у Санкт-Пецярбургу, з'яўляўся ўдзельнікам "Маршаў нязгодных", у свой час падпісаў зварот дзеячаў культуры з патрабаваннем адстаўкі прэзідэнта Расеі Уладзіміра Пуціна. А ў 2011 годзе Дзявотчанка публічна адмовіўся ад звання "заслужаны артыст Расеі" і дзвюх дзяржаўных прэмій.

Падтрымаў Дзявотчанка і Украіну. У сакавіку 2014 года разам з іншымі кінематаграфістамі ён падпісаў зварот "Мы з Вамі!".

У 2012 годзе Дзявотчанка быў збіты ў Маскве. Інцыдэнт адбыўся з групай прыезджых з Паўночнага Каўказа, якім не спадабалася, што ў Дзявотчанкі ў вуху была завушніца.